GARRA VUORUHEAMIT KULTURJUOLLUDEMIIN: Sámediggeráđđelahttu Olsen ballá ahte bohtet garra dávástusat go bušeahttabarggus eai nagot čuovvolit dan positiivva soju mii lea leamaš. Govva: Åse Pulk/Sámediggi

Ballá stáhtabušeahta unnidit Sámedikki kulturruhtadeami

Sámediggeráđđi lea dál bargagoahtán 2018 bušeahtain. Dál oaivvildit ahte sin doaibmanvejolašvuohta lea garrasit gáržžiduvvon, smávva lassáneami geažil stádabušeahtas.

13:31 Golggotmánu 20. beaivi 2017

Mannan vahkku almmuhii ráđđehus 2018 stádabušeahta. Dál oaivvilda sámediggeráđđelahttu Henrik Olsen ahte smávva lassáneapmi, mii doppe bođii, čuohcá Sámedikki juolludeami kultuvrralaš doaimmaide.

 

Eai nagot čuovvolit positiiva soju

Olsen ballá ahte bohtet garra dávástusat go bušeahttabarggus eai nagot čuovvolit dan positiivva soju mii lea leamaš.

– Lea vuostálasvuohta das go ráđđehus vállje čuohppat aiddo kulturdoarjaga, dál go sámi dáidda ja kultuvra viimmat lea ožžon stuora fuomášumi riikkaidgaskasaččat. Eahpidan ahte midjiide lea vejolaš láhčit sullasaš áŋgiruššamii boahtte jagi, go sii leat čuohppan nie ollu, dadjá Olsen.

 

– 10 miljovnna jávkan

– Midjiide lea hui váttis bisuhit dan dási mii mis lea leamaš kulturbušeahtas, dan sivas go ráđđehus ii joatkke daid ruđaid maid mii leat ožžon maŋimus viđa jagis Stoltenberg II Kulturloktema bokte. 10 miljovnna ruvnnu leat dál jávkan stáhtabušeahtas ja dat váikkuha ahte šaddet hirbmat garra vuoruheamit mat gáržžidit kulturbušeahta hui garrasit. Mii ballat kulturbušeahta duohtanjiedjamis, dadjá bušeahttaovddasvástideaddji ja sámediggeráđđi Henrik Olsen.

 

Hirbmat garra vuoruheamit

Ráđi mielas lea dattetge buorre go sámi gielat, oahpponeavvut, oahppoplánabargu ja sámi vistesuodjalus leat vuoruhuvvon. Maiddái sámi mánáidgárddit leat bušeahttavuoitit boahtte jagi, go juolludeamit galget váikkuhit dasa ahte sámi mánát ožžot iežaset giela ja kultuvrra ovddiduvvot mánáidgárddis juo.

Ollu dain ruđain mat gullet lassáneapmái leat merkejuvvon ruđat, ja ráđđi ferte garrasit vuoruhit.

– Mii áigut dán boahtte guokte vahku bargat Stuorradikki ektui geahččalan dihtii oažžut rievdaduvvot čuohppamiid stáhtabušeahttaevttohusas. Dat ii leat doarvái buorre, danne mii áigut dál bidjat ollu barggu dasa ahte oažžut oktavuođa rivttes stuorradiggepolitihkkáriiguin ja čilget sidjiide min hástalusaid, dadjá Olsen.

Fáddásánit
Ođđasat

På forsiden nå