II JÁHKE BOHTOSIIDDA: Árjja presideantaevttohasas Inger Eline Eriksen Fjellgrenas lea ain doaivva buori válgabohtosii, vaikke oaiviliskkadeamit eai čájet nu buori bohtosa Árjja dáfus. Govva: Inger Eline Eriksen Fjellgren

Veaháš ovdána, muhto ii vel ge seamma dásis go 2013:s

Varas oaiviliskkadeapmi čájeha ahte Árja ii vel ge olat ovddit válgga bohtosiid, vaikke leat ovdánan maŋemuš iskosa rájes.

06:00 Čakčamánu 05. beaivi 2017
Ođastuvvon: 05.09.2017 - 10:19

Jus ihttin livččii válga, de oččošii Árja 7,1 proseantta jienain. Dan čájeha oaiviliskkadeapmi man Sentio lea čađahan Ávvira ja NRK Sámi ovddas.

Dat lea 3,5 proseantačuoggá lassáneapmi maŋemuš iskosa rájes, mii čađahuvvui suoidnemánus.

Vaikke lea lassáneapmi maŋemuš iskkadeami rájes, de eai goit ge olat bohtosa mii maŋemuš válggas lei, 11,4 proseantta.

– Maŋemuš válggas lei mis hirbmat buorre boađus dan ektui go leat ain beanta ođđa bellodat, ja liikká oažžut nie olu jienasteddjiid. Dál mis lea bargu doalahit daid jienasteddjiid, lohká Árjja presideantaevttohas Inger Eline Eriksen Fjellgren.

 

Geardduha ahte ii jáhke

Sentio lea čađahan dán iskkadeami borgemánu loahpas, birrasii mánu maŋŋil dan ovddibu.

Go Sentio čađahii oaiviliskkadeami suoidnemánus, de logai Eriksen Fjellgren Ávvirii ahte ii riekta jáhke bohtosiidda, go Árja ii leat goassege ožžon buriid bohtosiid oaiviliskkademiin.

Dan son geardduha dál maid, ja sus lea doaivva oažžut buoret bohtosa go iskkadeapmi čájeha.

– Guovtti maŋemuš válggas eai leat oaiviliskkadeamit čájehan ahte oažžut olbmuid sisa. Dieđusge lea buorre go leat buoret logut go ovddit háve, in jáhke goit ahte ná lea boađus válgabeivviide. Lea váttis bellodagaide main eai leat listtut buot válgabiirriin, ja orru ahte daid eai olat, lohká son.

 

Jáhkká bures čađahan válgagičču

Vaikke ii riekta jáhke bohtosiidda, de jáhkká ahte Árjja válgagižžu lea buktán dan lassáneami man iskkadeapmi čájeha.

– Muitala ahte leat leamaš čielgasat válgagiččus, ja mu mielas orru Árja mii lea čielgaseamos mainna áigut bargat ovddasguvlui, namalassii ovddidit báikki olbmuid áššiid ja vuoigatvuođaid.

 

Ii jáhke 2013 lei erenoamáš jahki

Maŋemuš válggas oaččui ge Árja 11,4 proseantta jienain, mii lei lassáneapmi. Árja dagai bures eará bellodagaid ektui, mat manne maŋos.

– Dalle lei hirbmat buorre boađus dan ektui go leat ain beanta ođđa bellodat. Dál mis lea bargu doalahit daid jienasteddjiid.

 

– Dii lehpet ođđa bellodat, jáhkát go ahte ovddit válggain dagaidet erenoamáš bures, muhto ahte dál easka boahtá duohtavuohta?

– In dan gal jáhke, mii lea siivvut gorgŋon juohke válgga ektui, lohká Árjja presideantaevttohas.

På forsiden nå