DUHTAMEAHTTUN: Sámediggepresideanta Vibeke Larsen (Šiella) ii leat duđavaš oaiviliskkadeami bohtosiin. Son dattetge ii gáđa gal go guđii Bb, vaikke ii soaitte ieš beassat šat Sámediggái. Govven: Kila Anti

Ii olat proseantta ge oaivil­iskkadeamis

Šiella ii oaččo go 0.8 proseantta jienain, boahtá ovdan ođđa oaiviliskkadeamis. Viđas 600 olbmos vástidit ahte livčče jienastan bellodaga jus odne livččii válgabeaivi.

06:00 Čakčamánu 05. beaivi 2017
Ođastuvvon: 05.09.2017 - 10:02

Ođđa oaiviliskkadeamis, man Sentio Research Norge AS lea dahkan Ávvira ja NRK Sápmi ovddas, boahtá ovdan ahte 0.8 proseantta 600 olbmos livčče jienastan sámediggepresideantta Vibeke Larsena ođđa bellodaga Šiela, jus dál livččii válgabeaivi.

Ovddit oaiviliskkadeamis oaččui Šiella 0.6 proseantta jienain.

– In leat dieđusge duđavaš, dan in sáhte dadjat, lohká Šiela presideantaevttohas ja sámediggepresideanta Vibeke Larsen.

Son dattetge lohká ahte loahppabohtosa ii dieđe gal sihkkarit ovdal go válgabeaivvi, mii lea čakčamánu 11. beaivvi.

– Lea gelddolaš oažžut válgabohtosiid dál, dadjá son.

 

Mihtu ovttain áirasiin sisa

Vibeke Larsen lohká alddis mihtu oažžut ovtta áirasa sisa Sámediggái, makkár biirres, dat ii leat nu dehálaš.

– Mii eat leat bidjan čielga mihtu man ollu jienaiguin leat duđavaččat. Leat álgán maŋŋit, váldá áiggi boahtit oidnosii. Eat leat bidjan nu stuorra mihtuid, muhto ovtta áirasa sisa gal lea sávaldat, lohká Vibeke Larsen.

Son čilge ahte lea váttis leat seamma oidnosis buot biirriin, ja lohká iežaset leamašan oidnosis muhtin sajiin, eará báikkiin oaidná dárbbu leat eambbo oidnosis.

– Lea váttis evalueret man oidnosis leamašan ja ii, go mii leat dál ain válgagiččus, lohká son.

(Ášši joatká bellodatbaromehtera vuolábealde)

Ii gáđa dagu

Vibeke Larsen geassádii duvle Bargiidbellodagas, ja ásahii maŋŋá ođđa listta, Šiela.

Son ii loga gáhtan go geassádii, vaikko sáhttá dagahit ahte ii beasa Sámediggái.

– Mun oaivvildan ain ahte Sámedikkis lea dárbu sosialdemokráhtalaš bellodahkii, mii ii leat čadnon dáža bellodahkii. Vaikke sáhttá geavvat ahte in beasa Sámediggái, de in gáđa go mearridin dan maid mearridin dalle, lohká Vibeke Larsen.

Son lasiha ahte dan oktavuođas leamašan ollu beaggin su birra, nu oaivvilda ahte leamašan oidnosis medias, vaikko ii leamašan politihkalaš áššiid oktavuođas, de aŋkke leamašan oidnosis ja gullomis.

 

Váibmoášši

Šiela váldoášši lea ahte buot sápmelaččain galgá leat dásseárvu, beroškeahttá makkár guovllus boahtá.

– Mii oaidnit dárbbu loktet muhtun guovlluid, ja oaivvildat ahte Sámediggi berre juolludit eambbo ruđaid guovlluide gos lea dárbu nannet sámegiela, lohká Vibeke Larsen.

 

 

Fáddásánit
Válggat 2017

På forsiden nå