OHCANVEAHKA: Deanus lea stuora ohcanveahka jođus, muhto politiijat ohcalit maid soames eará olbmuid. Ovtta biilavuoddji gii finai láhppon olbmá viesu olggobealde, ja muhtun olbmo gii lei Sieiddá skuvlla olggobealde lávvordateahkeda. Govven: Silje Malene Varsi.

Ohcalit biillavuoddji gii lei láhppon olbmá viesu olggobealde

Lávvordateahkedis galgá leamaš biila Odd Henry Lahm viesu olggobealde Sieiddás. Politiijat ohcalit dál biilavuoddji.

13:29 Čakčamánu 20. beaivi 2017

Odd Henry Lahm dieđihuvvui láhppon mannan sotnabeaivvi. Su leat maŋemuš oaidnán lávvordaga.

Lávvordateahkeda, sullii 8-9 áigge, galgá leamaš biila su viesu olggobealde. Politiijat háliidivčče dál oažžut biilavuoddji ságaide.

– Biilavuoddji ii leat vel dieđihan iežas. Son soaitá oaidnán juoidá mii soaitá midjiide ávkin. Mis ii leat makkárge ágga jáhkkit ahte Lahm lea čuvvon biilla gosa ge, dahje ahte su leat dolvon, lohká Finnmárkku politiijaid operašuvdnajođiheaddji Stein Kristian Hansen.

Politiijat eai dieđe makkár biila dat lei, ja sávvet ahte biilavuoddji dieđiha iežas politiijaide, vai ožžot buot buoremus ipmárdusa dilis.

 

Geahččat muorraviesuin ja áittiin

Politiijat ávžžuhit maid olbmuid iskat iežaset barttaid, áittiid, muorraviesuid ja olgohivssegiid gaskal Sieiddá ja Unjárgga.

– Olmmái soaitá čiehkádan, dahje suoji dárbbašan, lohká Hansen.

 

Ohcan joatkašuvvá stuora veagain

Ohcanakšuvdna lea ain jođus, ja badjel 200 olbmo leat ohcame 80-jahkásaš dievddu. Son dieđihuvvui láhppon mannan sotnabeaivvi. Son lea demeansabuohcci, ja ledje ruovttubuohccidivššárat geat dieđihedje olbmá láhppon.

– Mis lea doaivva gávdnat olbmá, danne mii ohcat nu viidát ja stuorrát, lohká Stein Kristian Hansen.

Politiijat ohcalit maid olbmo gii lei Sieiddá skuvlla ja kapealla lahkosis lávvordateahkeda, sullii logi áigge.

– Sus ledje sevdnjes tuvrabiktasat badjelis.

Fáddásánit
Ođđasat

På forsiden nå