GOALMMÁDASOASSI JUO JIENASTAN: 32 proseantta sis geat leat Sámedikki jienastuslogus, leat juo jienastan. Logut maid Válgadirektoráhtta almmuhii mánnodaga gaskabeaivveáigge, čájehit ahte leat 5 534 ovdagihtiijiena. Govva: Scanpix

Ođđa olahus ovda­gihtii­jienasteamis

Ovdagihtiijienasteapmi lea lassánan olu eambbo go jienastuslohku. Sámedikki válgabargi mielas lea dat buorre.

18:06 Čakčamánu 11. beaivi 2017
Ođastuvvon: 11.09.2017 - 18:22

Dán jagi leat erenoamáš oallugat ovdagihtii jienastan Sámedikkeválggaide.

Mánnodaga gaskabeaivveáigge ledje 5 534 ovdalgihtii jiena, Válgadirektoráhta loguid mielde. 2013 válggain ledje 4 265 ovdalgihtii jiena.

 

 


ÁIGEMEARRI II VEL DIEVVAN: Sámedikke válgabargi Kjell Olav Guttorm vuordá vel eambbo jienaid. Govva: Ul-Juhan Partapouli

Sámedikki válgabargi Kjell Olav Guttorm lohká ahte lea váttis árvvoštallát manne lea nu, muhto son jáhkká ahte Sámedikki bealis leat váikkuhan dasa.

– Soaitá ahte leat leamaš oidnosis maŋemuš áiggi, mii leat bargan olu Sámedikki ovddidit sosiála mediain. Jáhkán leat olu áššit mat sámis leamaš daid maŋemuš áiggiid maid leat váikkuhan, ja ahte politihkkarat leat ovddidan áššiid. Mu bealis šaddá duššo árvvoštallan, jáhkán leat olu faktorat mat leat sivvan, lohká Guttorm.

 

Muhtun sajiin bággu ovdagihtii jienastit

Suohkaniin gos leat unnit go 30 olbmo sámedikki jienastuslogus, ii beasa jienastit válgabeaivvi.

Dain suohkaniin ferte ovdagihtii jienastit jus áigu jienastit.

– Lea lunddolaš ahte muhtun sajiin šaddet ovdagihtii jienastit. Jáhkán iežan bealis ahte Tråante doalut leat maid váikkuhan válga-oassálastimii.

 

Loga maid:  Válgabohtosat maŋŋonit

Loga maid: 18:s jávkan sámedikki jienastuslogus 

 

Oassálastin lassánan eambbo go jienastuslohku

Jienastuslohku lea lassánan measta guvttiin duháhiin maŋemuš válggaid rájes. Dál leat 16 958 jienastuslogus, 2013:s ledje 15 005. Dat lea 13 proseantta lassáneapmi.

Ovdagihtiijienasteapmi fas lea lassánan 30 proseanttain maŋemuš válggaid rájes.

Dat lea hui ilolaš Guttorm mielas.

– Mu mielas lea buorre go geavahit jienastanvuoigatvuođa. Lea dehálaš ahte olbmot servet válgii, ja lea hui buorre go dan dahket.

 

Áigemearri ii leat vel leamaš

Ovdagihtii-jienat eai leat vel ollislaččat, go ihttin lea easka maŋemuš áigemearri poasttas. Jienat sáhttet vel ihttážii lassánit. 

Guttorm ii duostta vel illudit, go eatnasat geat áigot jienastit soitet jienastan ovdagihtii.

– Jus hui unnán olbmot jienastit válgabeivviid, de sáhttá obbalaš válgaoassálastin unnit. Muhto orru ja soaitá buorre jahki, lohká Kjell Olav Guttorm.

På forsiden nå