SÁHTTET LEAT RÁĐIS: Ii galgga leat nu sihkar ahte dát golmmas leat oassin Sámediggeráđis go gonagas rahpá Sámedikki golggotmánus dán jagi. Guovttis sis goit leaba šiehtadallanjoavkkus ásahit eanetlogu Sámedikkis. Govas gurut ravddas: NSR boahtte presideanta, Aili Keskitalo, NSR Gáiseguovllu sámediggeáirras Henrik Olsen, ja NSR Davviguovllu sámediggeáirras Silje Karine Muotka. Govven: Sara Máret Ravdna Oskal (vuorkágovva)

NSR šiehtadallan­joavku válljejuvvon

NSR leat nu gearggus go sáhttet dál álgit šiehtadallat ovttasbargoguimmiiguin, go dál lea sis šiehtadallanjoavku maid válmmas.

15:04 Čakčamánu 14. beaivi 2017
Ođastuvvon: 14.09.2017 - 18:39

Lea dál dovddus ášši ahte Norgga Sámiid Riikasearvi lea sámediggeválgga vuoiti, go sii ožžot dál, oktiibuot NSR/SáB, olles 18 áirasa.

Eai váillo eambbo guovttis vel, de lea sis eanetlohku Sámedikkis boahtte njeallje jagi.

 

Šiehtadallit

Dál leat sii maid válljen šiehtadalliid geat galget soabadit ovttasbargošiehtadusa eará bellodagaiguin vai unnimusat ožžot guokte áirasa vel ovttasbargui.

 

Šiehtadallit leat:

1. Áili Keskitalo, presideantaevttohas, Ávjovári guovlu

2. Beaska Niillas, NSR jođiheaddji, Nuortaguovlu

3. Silje Karine Muotka, Davvi guovlu

4. Sandra Marja West, Gáisi guovlu

5. Runar Myrnes Balto, Viesttarmeara guovlu

På forsiden nå