DUĐAVAŠ: Åarjel-Saemiej Gïelh /ÅaSG listanjunuš Ellinor Marita Jåma. Vuorkágovva: Inga Marie Guttorm

Nagodan jorga­lahttit jiena­steddjiid

Åarjel-Saemiej Gïelh /ÅaSG jienasteaddjit dorjot bellodaga maiddái dál nu go njeallje jagi dás ovdal, čájehit ođđa bohtosat.

14:05 Čakčamánu 05. beaivi 2017

Ođđa oaiviliskkadeames boahtá ovdan ahte Åarjel-Saemiej Gïelh /ÅaSG oažžu fas ruovttoluotta jienasteddjiid mannan válgga rájes.

Suoidnemánus vástidedje dušše 33,30 proseantta ÅaSG jienasteddjiin jienastit fas listtu dán jagi, ja dál vástidedje fas 100 proseantta ahte bohtet fas jienastit bellodaga.

Suoidnemánu oaiviliskkadeamis oaččui ÅaSG 1,09 proseantta jienain, ođđa oaiviliskkdeamis ožžot ges 1,40 proseanta jienain, ja nu leat ge maid ovdánan suoidnemánu rájes.

 

Hui duđavaš

Åarjel-Saemiej Gïelh /ÅaSG listanjunnoša Ellinor Marita Jåma mielas lea erenoamáš illusáhka go čájehuvvo ahte olbmuin lea jáhku bellodahkii.

Oktiibuot 600 olbmo leat searvan oaiviliskkadeapmái maid Sentio lea čađahan NRK Sámi ja Ávvira ovddas.

– Lean hui duđavaš, lea illudahtti bohtosat, lohká Ellinor Marita Jåma.

 

Olahit olbmuid sosiálamedias

Son lohká dál lahkona válgabeaivi ja jienasteaddjit soitet leat eambbo dihtomielalačča maid bohtet jienastit.

– Mii gal leat geahččalan leat oidnosis, ja leat erenomáš ollu geahččalan geavahit sosiálamediaid bokte olahit olbmuid, muitala son.

 

Areála váibmoášši

Åarjel-Saemiej Gïelh /ÅaSG váibmoášši lea suodjalit areálaid, go areálat leat nu rašis dilis.

– Min guovllus leat sisabahkkemat stuorámus áittan. Dieđusge lea mánát ja giella maid áššit mas mii maid beroštat, nu go buot eará bellodagat. Areála lea deháleamos, go boazodoallu lea mii guoddá mátta sámi kultuvrra. Jus boazodoallu jávká de jávká maid kultuvra ja giella, čilge Ellinor Marita Jåma guhte lea hui duđavaš ođđa oaiviliskkadeame bohtosiiguin, muhto deattuha ahte lea ain guhtta beaivve válgii ja ahte lea dušše unna oassi jienasteddjiin geat leat oasálastán oaiviliskkadeamis ja dat lea riikaviidosaččat.

 

 

På forsiden nå