Niklas Labba lea virgáduvvon ođđa fágalaš jođiheaddjin UiT Norgga Árktalaš Universitehta Sámi dutkamiid guovddážii. Vuorkágovva: Inga Renate Buljo

Jođihiš­goahtán Sámi dutkamiid guovddáža

Niklas Labba lea virgáduvvon UiT Norgga Arktalaš Universitehta Sámi dutkamiid guovddáža ođđa fágalaš jođiheaddjin.

12:13 Čakčamánu 25. beaivi 2017
Ođastuvvon: 25.09.2017 - 12:44

Boahtte njeallje jagi galgá Niklas Labba bargat Sámi dutkamiid guovddáža fágalaš jođiheaddjin.

Son álggii virgái čakčamánu 11. beaivvi ja válddii badjelasas virggi maŋŋel go Else Grete Broderstad álggii guovddáža eamiálbmotmastera professorin ja fágalaš oktiiheiveheaddjin, dieđiha universitehta iežaset neahttasiidduin.

 

Illuda fas dutkansurggiin bargat

Labba jođihii Sámedikki giellahálddašan- ja politihkkajuhkosa ovdal go álggii UiT Norgga Árktalaš Universitehtii.

Son lea máŋga jagi bargan dutkin ovddeš Sámi Instituhtas ja Romssa universitehtas.

Dasa lassin lea son bargan sámi áššiiguin Árktalaš Ráđis ja Ovttastuvvan našuvnnain.

– Mun illudan fas bargagoahtit dutkanáššiiguin nana fágabirrasis ja bidjat návccaid dustet erenoamážit sámi servodaga dutkandárbbuid, lohká Niklas Labba.

 

Jođihan stuorebuš dutkanprošeavttaid

Niklas Labba lea bajásšaddan Badje-Sohpparis rádjerasttildeaddji boazodoalus, ja su siiddas lea geasseorohat Dieváidvuovddis Sis-Romssas.

Su fágalaš duogáš leat čadnon erenoamážit árbevirolaš dihtui, boazodollui ja ekonomiijii.

Son lea universitehtas ovdal jođihan ja oassálastán stuorebuš eurohpalaš dutkanprošeavttain mat leat guoskan sámi ja eamiálbmotjearaldagaide ja dálkkádatrievdadusa hástalusaide.

Fáddásánit
Ođđasat

På forsiden nå