OHCANVEAHKA: Deanus lei ikte stuorra ohcanveahka ohcamin Odd Henry Lahm. Dál leat loahpahan ohcama go ii leat šat doaivva gávdnat su eallinaga, muhto politiijat gal jotket liikká ohcama. Govven: Silje Malene Varsi.

Heitet ohcamis Odd Henry Lahma

Politiijat leat loahpahan ohcama dán vuoro, go ii leat šat doaivva gávdnat Odd Henry Lahm eallinaga.

09:48 Čakčamánu 21. beaivi 2017
Ođastuvvon: 21.09.2017 - 14:54

Odd Henry Lahm dieđihuvvui láhppon mannan sotnabeaivvi Deanus.

Su leat maŋemuš oaidnán lávvordaga, ja sturra ohcanveagat leat dan rájes ohcan su. Dál leat politiijat loahpahan ohcama:

– Mii geahčadat ja árvvoštallat gos dán rádjái leat ohcan. Go fas joatkit ohcama, de eat boađe geavahit seamma olu olbmuid veahkkin, nu go dán rádjai leat dahkan. Mis leat leamašan 200 olbmo veahkkin ohcamin gitta otnážii. Otne ii leat oktage ohcamin. Mii joatkit ohcat su, muhto eat leat vel dadjan goas mii dan dahkat , mii áigut gal gávdnat su liikká, dieđihit Finnmárkku Politiija operašuvdnaguovddážis.

 

Biila oidnon

Lávvordateahkeda sullii 8-9 áigge leamaš biila su viesu olggobealde. Politiijat ohcaledje árabus dán vahkkus biilavuoddji ságaide.

 

– Leat go ođđa dieđut dan biilla birra mii oidnui su stobu olggobealde?

– Justa dainna in dieđe mo manná, mun rehkenastán lea váldon mielde árvvoštallamis. Go jo eat oza šat, de leat várra gávdnan daid dieđuid maid darbbašit, dadjet operašuvdnaguovddážis.

 

Geahččat muorravisttiin ja áittiin

Politiijat ávžžuhedje ikte olbmuid iskat iežaset barttaid, áittiid, muorravisttiid ja olgohivssegiid, Sieiddá ja Unjárgga gaskkas.

– Olmmái soaitá čiehkádan, dahje suoji dárbbašan, lohká Finnmárkku politiijaid operašuvdnajođiheaddji Stein Kristian Hansen.

På forsiden nå