– MANNÁ BURES: Kredihttaekonoma Ruud lohká ahte ealáhusaiguin manná bures, muhto ávžžuha fitnodagaid čuovvut mielde daid fitnodagaid maiguin gávppaša. Preassagovva.

Eai šat lihka olu reastaluvvamat

Mannan borgemánu ledje 18,4 proseantta unnit reastaluvvamat go diimmá borgemánus ledje.

11:16 Čakčamánu 09. beaivi 2017

Logut maid Bisnode lea almmuhan čájehit ahte ealáhuseallimis njidjet reastaluvvamat. Borgemánu dán jagi ledje 18,4 proseantta unnit reastaluvvamat go diibmá seamma mánu. Dássážii dán jagi leat reastaluvvamat njiedjan 2,6 proseanttain, go buohtastahttá diimmá jagi seamma áigodaga.

– Lea illudahtti go logut njidjet, ja lea čielga mearka ahte ealáhusaiguin manná buoret dál, lohká kredihttaekonoma Bisnodes, Per Einar Ruud. Dan son cealká Bisnode preassadieđáhusas.

 

Njiedjan

Dán jagi vuosttaš gávcci mánus reastaluvve dahje bákkuin heaittihuvve 3979 fitnodaga. Obbalaččat lea dat 2,6 proseantta unnit go diibmá seamma áigodaga. Dan maŋemuš 12 mánus leat reastaluvvamat njiedjan 1,9 proseantta.

– Mii leat áiggi mielde oaidnán ahte eai leat lihka olu fitnodagat maiguin manná hejot. Dat lea hui somás diehtu norgalaš ekonomai, lohká Ruud.

– Ovddasguvlui orru maid bures mannáme, go maŋemuš áiggiid leat boahtán buorit dieđut oljo- ja gássasuorggis, joatká son.

 

Fidnosuorggit ovdánan

Eanaš surggiin njidjet reastaluvvamat. Industriijas, mátkeealáhusas, bálvalusaiguin ja fievrofitnodagaiguin leat njiedjan reastaluvvamat.

– Mii oaidnit maid ahte manná bures opmodatsuorggis, huksensuorggis, ráhkadusfágas, ja maid hotealla ja restauráŋŋa fidnus. Lea erenoamáš buorre go dáin surggiin leat leamaš olu reastaluvvamat maŋemuš jagiid, lohká kredihttaekonoma.

 

Olusat bákkuin heaittihuvvet

Dán jagi heaittihuvve 33 proseantta unnit fitnodagat go diibmá borgemánu. Muhto dattege leat daid maŋemuš 12 jagis lassánan bággoheaittiheamit. Eiseválddit leat šaddan heaittihit 6,4 proseantta eambbo fitnodagaid.

– Dat leat dávjá unna fitnodagažat maid ii leat olu oasuskapitála. Dávjá lea váilevaš rehketdoallu sivvan, lohká Per Einar Ruud.

– Bisnode logut muitalit olu movt ealáhuseallimis manná obbalaččat, muhto addá maid várrehusa eará fitnodagaide mat sáhttet olu massit jus eará fitnodagat eai ceavzze. Danne lea hui dehálaš čuovvut daid fitnodagaid maiguin gávppaša, lohká Ruud.

Fáddásánit
Ođđasat

På forsiden nå