VUORDÁ AHTE ČUOVVOLUVVO RUĐAIN: Mii leat duhtavaččat dainna ahte ráđđehus dál lea mearridan čielggadit oktiilokaliserema viidáseappot, muhto vuordit ahte dát čuovvoluvvo ruđain bušeahtas, sihke huksemii ja viessoláigoruhtadeapmái, dadjá sámediggeráđđi Mariann Wollmann Magga preassadieđáhusas. Govven: Åse M.P Pulk/Sámediggi (Preassagovva)

Duhtavaš go oktii­lokaliseren dál galgá čielgga­duvvot

Sámediggeráđđi Mariann Wollmann Magga lea duhtavaš go ráđđehus dál lea positiiva árvvoštallat Beaivváš Sámi Našunálateáhtera ja Sámi joatkkaskuvlla ja boazodoalloskuvlla oktiilokaliserema. Son vuordá ahte dát čuovvoluvvo ruđain.

10:33 Čakčamánu 05. beaivi 2017

Maŋemus ráđđehuskonferánssas lea ráđđehus mearridan addit Kulturdepartementii ja Máhttodepartementii oktasaš bargun ja geavahit Statsbygga ráhkadit ollislaš mearridanvuođu oktiilokaliseremii, vuordámušain ahte konkrehta čađahaniskkadeapmi lea gárvvis dán jagi loahpas.

Dan ovdanbuvttii EU-ministtar Frank Bakke Jensen preassakonferánssas Guovdageainnus mánnodaga.

– Mii leat duhtavaččat dainna ahte ráđđehus dál lea mearridan čielggadit oktiilokaliserema viidáseappot, muhto vuordit ahte dát čuovvoluvvo ruđain bušeahtas, sihke huksemii ja viessoláigoruhtadeapmái, dadjá sámediggeráđđi Mariann Wollmann Magga.

 

Dorjot čađahaniskamuša konklušuvnna

Mearrádus boahtá maŋŋel go Statsbygg Sámedikki bargogohččuma vuođul lea iskan makkár vejolašvuođat leat oažžut Beaivváš Sámi Našunálateáhterii ođđa teáhterviesu.

Čađahaniskamuša konklušuvnna ja rávvema vuođul mearridii Sámediggi doarjut ođđa viesu ovttas Sámi joatkkaskuvllain ja boazodoalloskuvllain, ja jus dat ii leat vejolaš, de sierra, veahá smávit viesu Beaivvážii.

– Sámediggeráđđi doarju čađahaniskamuša konklušuvnna ahte sámi joatkkaskuvlla ja boazodoalloskuvlla ja teáhtera oktiilokaliseren lea ulbmilleamos ja attášii eanemus positiiva doaibmavejolašvuođa, dadjá Mariann Wollmann Magga preassadieđáhusas.

På forsiden nå