GUOVDAGEAINNU DÁLONIID LISTU: Listonjunuš Isak Mathis O. Hætta jáhkká beassat joatkis Sámedikkis, vaikke dássážii lohkkon jienat eai čájet nu. Son diehtá sus leat jienasteaddjit Guovdageainnus geat su dorjot, ja jáhkká oažžut doarvái jienaid. Govven: Sárá Máret Rávdná Oskal

Dorvvasta Guovdageainnu jienaide

Guovdageainnu dáloniid searvvi Isak Mathis O. Hætta jáhkká oažžut áirasa Sámediggái, vaikke dássážii eai leat ožžon go 0,8 proseantta jienain. Prognosat čájehit ahte ii leat vuos áirras Guovdageainnu dáloniid searvái. – Jáhkán go buot Guovdageainnu jienaid leat lohkan, de lea áirras siste, lohká Hætta.

22:35 Čakčamánu 11. beaivi 2017

Dássážii leat lohkan 46 proseantta jienain. Go Ávvir fitná Guovdageainnu Villmarkssenteris, de lea Isak Mathis bassame gievkkana, ja ráhkkaneame nuppi iđidii, gussiide borramuša. Son ii lean oaidnán bohtosiid ovdal go Ávvir čájehii daid. 0,8 proseantta Guovdageainnu Dáloniid Listui.

– Dát logut eai leat nu buorit logut. Ii nu buorre dássážii gal, muhto vuorddán buoret loguid, lohká listonjunuš Isak Mathis O. Hætta.

– Ii leat nu imáš go leat olles riika jienat, mii leat duššo Guovdageainnus, lasiha son.

 

Vuordá Guovdageainnu loguid

Guovdageainnu dáloniid searvvi listu lea duššo Ávjovári válgabiires, masa gullet Guovdageainnu suohkan, ja Kárášjoga ja Porsáŋggu gielddat.

Ii leat diehtu guđe guovllu jienat leat lohkkon dássážii, ja dasa dorvvasta Hætta. Son vuordá eanemus jienaid Guovdageainnus, ja ii jáhke ahte Guovdageainnu jienat leat vel lohkkon.

– Lea váttis einnostit. Jus jienat leat ovdamearkka dihte Porsáŋggus lohkkon, gos maŋemuš eat oba ožžon ge jienaid. Dahje Kárášjogas gos eat ožžon eará moaddelogi jiena. Leat Guovdageainnus gos dat jienat bohtet, ja jáhkán gal eambbo boahtit, lohká son. Sus lea doaivva áin beassat Sámediggái, go jáhkká oažžut dan mađe jienaid go maŋemuš válggain.

 

Ii jáhke juohkáseami váikkuhit

Dán áigodagas Isak Mathis O. Hætta ovddasta Dáloniid listu. 2013 válggain ožžo 2,7 proseantta jienain. Dál lea Dáloniid listu juohkásan guovtti listui, Guovdageainnu dáloniid searvi ja Dáloniid listu Sámediggái.

– Mun in jáhke diet juohkin váikkuha Guovdageainnu jienaide nu olu. Mun jáhkán Guovdageainnu jienaid váldit mii, go guoská dálon-listui, lohká Hætta.

På forsiden nå