ÁIGOT RUĐALAČČAT DOARJUT: Bargiidbellodaga njunuševttohasat Nuortaguovllu válgabiires celket ahte áigot bargat dan ala vai Sámediggi doarju lágasteddjiid ruđalaččat. Preassagovva.

Dorjot stevdnema

– Mii doarjut báikkálaš olbmuid, ja doarjut sin gáibádusa fámohuhttit Deanosoahpamuša, cealká Bargiidbellodat.

17:18 Čakčamánu 07. beaivi 2017

Odne dieđihedje Deanočázádaga luossareiveeaiggádat ja Deanočázádaga luossabivdosearvi ahte leat stevdnen stáda Deanosoahpamušaáššis.

Bargiidbellodat doarju stevdnema, dan celket preassadieđáhusas.

 

– Eai guorahallan juridihkalaččat

– Šiehtadus rihkku báikkálaš luossabivdiid rivttiid. Lea riekterihkkuma go báikkálaš olbmot šaddet addit birrasii 1660 oaggunjándoriid suoma bartaeaiggádiidda. Stáhta bargá dan vuođu haga, ja ii buhtat maide geaidda guoská. Ii boađe lagabui riekte konfiskerema, lohká Elisabeth Erke. Son lea Bargiidbellodaga várrepresideantaevttohas.

Bargiidbellodat cealká ahte lea čielggas stáhta ii leat makkár ge juridihkalaš guorahallama čađahan Deanosoahpamuša dohkkeheamis.

– Dasto lea báikkálaš olbmuid duohken čađahit rievttálaš čielggadeami, cealká Bargiidbellodat.

 

Lohpidit ruđalaččat doarjut

Tom Sottinen lea nubbin evttohas Nuortaguovllu válgabiires. Son lohpida ahte bohtet sihtat Sámedikki ruđalaččat doarjut riekteproseassa.

– Lea šállošahtti go eat leat ožžon politihkalaš čovdosa áššis, ja ahte dál ferte riektevuogádagas čielggaduvvot. Nuortaguovllu válgabiire njunuševttohasat lohpidit dál ahte boahtit čuovvolit ášši. Boahtit bivdit Sámedikki sihkkarastit ekonomalaš resurssaid báikkiolbmuide vai sáhttet čađahit riekteproseassa. Mii leat duhtavaččat go Bargiidbellodat lea geažuhan ahte háliidit ođđasit šiehtadit, vai ii galgga šaddat diggeášši, lohká Tom Sottinen.

– Lea erohus go lea riekti, ja oažžut rievtti. Lea nu ahte báikki olbmot dál šaddet geavahit resurssaid oažžut rievtti. Gažaldat lea maid ahte leat go Stuoradikkis diehtán ahte stáhtaráđđi Helgesen lea addán suoma bartaeaiggádiidda nuvttá oagguma norgga beallai, lohká Inga Pettersen Lindi.

Son lea goalmmát evttohas Nuortaguovllu válgabiires.

På forsiden nå