PROGNOSAID MIELDE SISTE: Vaikke dálá prognosaid mielde lea Vibeke Larsen Sámedikkis, de goit ge ii illut vel. Vuorkágovva: Astrid Helander.

Dálá prognosaid mielde siste: Larsen ii vuos illut

Muhto ii jáhke vel ovdal go buot jienat leat lohkkon.

00:02 Čakčamánu 12. beaivi 2017
Ođastuvvon: 12.09.2017 - 09:12

Viesttarmeara válgabiirres leat 49,9 proseantta jienain lohkkon. Gaskaboddosaš bohtosat čájehit ahte Šiella oažžu ovtta áirasa sisa, dálá sámediggepresideantta Vibeke Larsena. Son ii illut gal dan dihte.

– Ii leat vuos bealli ge jienain lohkkon. Mii sáhttit ain massit dan áirasa, nu ahte mun vuorddán dássážii go lea áibbas čielggas, lohká Šiela vuosttaševttohas Viesttarmearas, Vibeke Larsen.

 

Viesttarmearas gilvaleaba

– Viesttarmearas leat unna margiinnažat, dáppe sáhttá okta jietna mearridit olu. Lea dieđusge somá go dál lean siste, muhto dat ii leat vel sihkar, lohká Larsen.

Olgeš doarrida ge Šiela, 7,7 proseanttain. Olgežis ii leat dálá prognosaid mielde áirras Sámedikkis. Jus mannet Šiela meattá, de Šielas ges ii leat áirras.

– Lean ovttasbarggus Olgežiin, ja olu ovttasbargan Olgeža njunnošiin, Lars Filip Paulseniin. Suinna lean bures ovttasbargan, ja sávan moai goappašagat besse sisa, lohká Larsen.

– Šaddá gelddolaš idja, muhto eai han bohtosat láve čielgat ovdal go beannot vahku maŋŋel. Ii mihkke leat sihkar ovdal go buot jienat leat lohkkon, go margiinnat leat nu unnit, lohká Vibeke Larsen.

På forsiden nå