Dá leat ođđa oaivil­iskkadeami bohtosat

Dás oainnát makkár bohtosat dain iešguđet bellodagain leat ođđa oaiviliskkadeamis man Sentio lea čađahan NRK Sámi ja Ávvira ovddas.

06:00 Čakčamánu 05. beaivi 2017
Ođastuvvon: 05.09.2017 - 09:43

Sentio Research Norge AS lea čađahan sámediggeválgga oaiviliskkadeami NRK Sámi ja Ávvira ovddas, masa oktiibuot 600 olbmo serve.

Mannan oaiviliskkadeami rájes, mii čađahuvvui suoidnemánus, de lea Norgga Sámiid Riikkasearvi (NSR) ovdánan hui ollu, oktiibuot 13,5 proseantačuoggáin lassána bellodat.

NSR váldá jienasteddjiid buot bellodagain, ja lea dat bellodat mii nagoda háhkat alcces eambbo ođđa jienasteddjiid.

 

Ovdánan maid

Árja lea maid ovdánan ja lea duppalastán iežas proseantačuoggáid.

Suoidnemánus vástidedje 3.6 proseantta ahte áigot jienastit bellodaga, ja dál vástidedje 7,1 proseantta ahte jienastit bellodaga.

 

Massá jienaid

Bargiidbellodat massá oktii 7,2 proseantačuoggá ovddit iskkadeami rájes.

Sentio Research čállá ahte sáhttá čatnasit dasa ahte bellodat massá obbalohkái jienaid riikadásis.

Jienat maid bellodat massá leat dál eahpesihkkaris jienasteaddjit ja Bargiidbellodagas lea ain vejolašvuohta oažžut sin ruovttuluotta.

 

Badjel bealli jienain SáB:i

«Eará bellodagat» ožžot 6,4 proseantta jienain, Sámeálbmot Bellodat (SáB) oažžu sullii badjel beali, oktiibuot logi olbmo dan 600 jerron olbmos vástidedje ahte livčče jienastan SáB jus dál livččii válga, boahtá ovdan ođđa oaiviliskkadeamis.

 

Ii einnos áirraslogu

Dán oaiviliskkadeami bohtosiin ii leamašan vejolašvuohta geahččat galle áirasa guđege bellodat livččii ožžon Sámediggái jus odne livččii čađahuvvon válga.

 

Fáddásánit
Válggat 2017

På forsiden nå