JOĐUS KÁRÁŠJOHKII: Juste dál lea NSR presideantaevttohas biillas, gaskal Guovdageainnu ja Kárášjoga. Muhto son lea gullan movt singuin manná, ja illuda go leat buorit bohtosat. Dá lea son govven «iežára» go lea mátkkis Kárášjohkii. Iežár: Aili Keskitalo

– Buorit prognosat, muhto in duostta vuos illudit

NSR presideanta ii duostta vuos illudit, muhto mieđiha ahte sis leat buorit prognosat mat dán rádjái leat boahtán.

22:14 Čakčamánu 11. beaivi 2017
Ođastuvvon: 12.09.2017 - 10:02

Go 42,8 proseantta jienain leat lohkkon, de lea Norgga Sámiid Riikasearvi ožžon 28,5 proseantta jienain.

Jus doallá deaivása, de ožžot sii dainna 15 áirasa Sámediggái.

Dainna lea NSR presideantaevttohas, Aili Keskitalo, hui duhtavaš.

 

Buorit prognosat

– Juo, dat leat buorit prognosat mis dál, muhto oažžut go mii daiguin proseanttaiguin áirasiid Sámediggái, dat lea gažaldat, lohká son.

– Eahpitkeahttá minguin manná bures, dan gal mieđihan, ja dieđusge ii leat mus makkárge ágga eahpidit ahte ii galgga sullii ná maid šaddat boađus go buot jienaid leat lohkan, lohká son vel loahpas.

 

Keskitalo lea maŋŋonan, ja lea dál Jergula ja Kárašjoga gaskkas vuodjime, jođus Kárášjohkii.

På forsiden nå