Davvi-Hålogalándda bisma Olav Øygard, Romssas. Govven: Håkon Mosvold Larsen / NTB Scanpix

Bismat galget bures­sivdnidit Eurohpá­geainnu 105 Finn­márkkus

Go ođđa Eurohpágeaidnu gaskal Girkonjárgga ja Murmánskka rahppo boahtte vahkus, de galget guokte bisma buressivdnidit dan geainnu. Davvi álbmogis leat oskumeanut hui nannos, muitala ekspearta.

15:30 Čakčamánu 21. beaivi 2017

– Ii leat nu dábálaš, muhto mii áinnas bargat muhtimin eahpedábálaččat maiddái, muitala bisma Davvi-Hålogalándda bismagottis, Olav Øygard, gii lea bovden Murmánskkas metropolihta Simona buressivdnidit E105 geainnu suinna ovttas.

Dat dáža oassi E105 geainnus lea sullii miilla guhki.

– Mii áigut rohkadallat ovttas vai olbmot sáhttet dorvvolaččat mátkkoštit dán geainnus. Maŋŋá rohkadallama mii gulahat buressivdnádusa geidnui, muitala Øygård, Vårt Land aviisii.

Meanut galget deattuhit kránnjái gaskavuođaid nuorta guovllus, ja maiddái dan buori girkolaš oktavuođa gaskkal Norgga girku ja  Ruošša ortodoksakirku rádjáguovlluin, dadjá bisma.

 

Sámi kultuvra

Go Stáhta geaidnodoaimmahat gulai historjjá Petsjenga muŋkka Trifon birra (1495-1583), man maŋis tunealla lea gásttašuvvon, de evttohedje dalle dákkár meanuid čađahit.

– Sámi kultuvrras leat olu árbevierut čatnon iešguđet guovlluide, maid ferte gudnejahttit dahje meanuid čađahit  doppe. Olbmuide davvin leat dát meanut  nannosit čatnon, nu maiddái sámiid guovlluin, muitala vuosttašamanuensa Sámi dutkiid guovddážis Torjer Andreas Olsen.

Fáddásánit
Ođđasat

På forsiden nå