MODDJÁ BEALJIS BEALLJÁI: Jus dát bohtosat dollet, de leat NSR:i ja presideantaevttohassii, Aili Keskitaloi, oalle historjjálaš boađus. Go jus dál livččii válga, de ledje oažžut 33,3 proseantta jienain. Nu bures eai leat dahkan 24 jahkái. Govven: Nils Johan Vars

Aili moddjá bealjis bealljái: Buore­mus logut 24 jagis NSR:i

Norgga Sámiid Riikkasearvi guođđá čáhppadin eará bellodagaid ođđa bellodatbaromehteris. Lea vuosttaš geardde 24 jagis go leat ná buorit logut NSR:s go dál leat, jus livččii válga dál.

06:00 Čakčamánu 05. beaivi 2017
Ođastuvvon: 05.09.2017 - 09:43

Oaiviliskkadeamis man Sentio Research Norge AS lea čađahan Ávvira ja NRK Sámi ovddas, boahtá ovdan ahte 33,3 proseantta jienasteddjiin livčče jienastan Norgga Sámiid Riikkasearvvi, jus dál livččii válga.

Dat lea 9,4 proseantta ovdáneapmi 2013 válggaid ektui, ja 13,5 proseantta ovdáneapmi suoidnemánu mihtideami ektui.

Vuolimusas áššis oainnát videos mo Aili Keskitalo reagerii go beasai oaidnit loguid.

 

Buorit bohtosat

Maŋemus go nu buorit logut sis leat leamašan, de lei Ole Henrik Magga sámediggepresideanta, Ole Henrik Buljo lei Guovdageainnu sátnejođiheaddji, ja Kjell Sæther lei dušše viđát jagis iežas 23 jagi sátnejođiheaddjeáigodagas Kárášjogas, Ann Mari Andersen vuittii Sámi Grand Prix, Aili Keskitalo lei 25-jagi boaris, ja jahki lei 1993.

(Ášši joatká baromehtera vuolábealde)

 

24 jagi áigi

NSR válgabohtosat 1989 rajes:

1989: 45,5 proseantta

1993: 39,7 proseantta

1997: 31,6 proseantta

2001: 30,9 proseantta

2005: 26,3 proseantta

2009: 21,0 proseantta

2013: 24,3 proseantta

2017: 33,3 proseantta (bellodatbaromehter borgemánu 2017)

Jus dál livččii sámediggeválga, de livččii Norgga Sámiid Riikkasearvi (NSR) dahkan goalmmádin buoremus válgga áiggiid čađa.

Dušše 1989:s (45,5 proseantta) ja 1993:s (39,7 proseantta) lea NSR ožžon buoret loguid go dál bohtet ovdan bellodatbaromehteris.

Dainna lea NSR presideantaevttohas hui duhtavaš, muhto maid hirpmahuvvan:

– Lea go duohta? Nie olu ovdánit? Na dat gal lea hui somá. Mun lean hui giitevaš go orru nu leamen ahte jienasteaddjit oaivvildit ahte mii galgat stivret, lohká son go Ávvir čájeha sutnje daid loguid.

 

– Eat vuos geargan válgagiččuin

Keskitalo ii liikká njuike dáhkkái.

Son logai ovdal go beasai oaidnit loguid, ahte son lea ráhkkanan vaikke makkar bohtosii, ja nu maid ii njuiken dáhkkái go nu buriid bohtosiid NSR oliha.

– Galgá muitit ahte mis lea vel váhku válgii, ja dá leat dušše oaiviliskkadeapmi, nu ahte mii gal fertet ieža muitit dan ahte eat ábut doaivut dál leat geargan bargguin, go mii eat leat geargan válgagiččuin vuos, lohká son, ii ge loga galgat sin dál juo vuoiŋŋastit álgit.

 

Deháleamos doalahit loguid

Keskitalo ii loga ge sin galgat vuoiŋŋastit válgagiččuin.

– Vahkku ovdal válgga de šaddá mis dál deháleamos doalahit loguid mat dál leat, lohká son.

Jus dan bohtosii lasiha vel NSR/SáB jienaid Nuorta-guovllus, geaid áigot 3,2 proseantta jienastit dán bellodatbaromehtera loguid mielde, de oliha NSR olles 36,5 proseantta jienasteddjiin.

Dat lea badjel goalmmádasoassi sámi jienasteddjiin, ja leat liiggás stuorimus bellodat olles sámedikkis.

 

Vižžet buohkain jienasteddjiid

Logut mat bohtet ovdan bellodatbaromehteris, čájehit maid ahte NSR iežaset ovdánemiin vižžet jienaid dadjat juo buot bellodagain Sámedikkis.

80 proseantta sis geat 2013:s jienastedje NSR, livčče dál maid jienastan NSR.

13 proseantta Bargiidbellodatjienasteddjiin livčče dál NSR jienastan, olles 22 proseantta fas Árjja jienasteddjiin, 9 proseantta vižžet Olgešbellodagas, Johttisápmelaččaid listtus 17 proseantta, ja 12 proseantta fas Guovddašbellodaga jienasteddjiin.

Sii masset 15 proseantta NSR/SáB bellodahkii.

 

 

 

 

På forsiden nå