Sámedikkis leat jiansteaddjit jávkan jienastanlogus. Čájáhusgovva ja vuorkágovva.

18:s jáv­kan Sáme­dikki jiena­stus­logus

Máŋggas geat leat ovdal leamašan Sámedikki jienastuslogus vásihit namaset jávkan jienastuslogus. Kimme Utsi lea okta sis gii vásihii dan ikte, go áiggui jienastit ráđđeviesus Romssas. Ossodatdirektevra Sámedikkis lohpida ahte buohkat geat háliidit veahki, galget oažžut dan.

14:43 Čakčamánu 11. beaivi 2017
Ođastuvvon: 11.09.2017 - 18:24

– Mun lean jienastan 1991 rájes, dalle go ledjen 18 jahkásaš ja orron Kárášjogas. Go orron Kárášjogas de gal vajot čálihedje mu jienastuslohkui, go mus lea Utsi goargu. Dalle čálihedje min, geat leimmet 18 jagi, automáhtalaš jienastuslohkui, muitala Kimme Utsi.

 

Kimme Utsi lea ovdal jienastan Romssas, gos son lea orron  10 jagi.

– Dál fáhkka ledjen gahččan eret. In mun dieđe manin, hui ártet. Ráđđeviesus dadje ahte golmmas earát Romssa gávpogis ledje vásihan dan seamma go mun, muitala Utsi.


Kimme Utsis govva. Priváhta govva

Son čálii dán birra facebookas, ja Sámediggi válddii de suinna oktavuođa.

– Sii jerre goas mun vuosttaš háve jienastin. Tove Anti geahčai mu ášši ja sáddii munnje PDF fiilla maid šadden printet báhpárii Romssas ja váldit mielde ráđđevissui, muitala Utsi.

 

Eai dieđe mii lea dáhpáhuvvan

– In dieđe manin dat lea dáhpáhuvvan. Jus mun dien gažaldaga vástidan, de šaddá beare spekulašuvdna, ja dan in hálit mun, muitala Sámedikki ossodatdirektevra Rávdná Buljo Gaup.

Sámediggi lea dieđihan jienasteddjiide ahte jus eai gávnna iežaset nama šat Sámedikki jienastuslogus, de sáhttet riŋget Sámedikki ráđđeaddái Tove Antii, telefonnummar 78474145 / 40044823, ja dalle veahkeha son ođđasit registreret jienastuslohkui.

 

18 olbmo jávkan jienastuslogus

Dán rádjai leat 18 olbmo dieđihan ahte sii eai leat šat jienastuslogus, muhto ii sámedikkis leat vejolašvuohta diehtit gallis leat gahččan eret jienastuslogus.

– 17:s leat fas ođđasit čálihuvvon jienastuslohkui, ja besset jienastit.  Okta fas ii lean ohcange čáliihuvvot jienastuslohkui, ja go ii leat ohcan áigemeriid siskkobealde, de ii bija Sámediggi su jienastuslohkui ovdalgo ohcá rievttes láhkai, muitala Gaup.

 

Ođđasit registreret
Go ođđasit registrere jienastuslohkui, de fertejit Sámedikkis vuos iskat leat go ovdal leamašan jienastuslogus ja jus ii, de fertejit iskat leat go čálihuvvon goassige lohkui.
– Ádjána sullii diibmobeali. Olbmot ožžot veahki, mis lea bargi dáppe idjii, muitala Gaup.

 

Buohkat ožžot veahki

Mo dáhpáhuvvá jus hui olusat riŋgejit oktanaga? Leat go doarvái bargit dasa?

– Dat gal čoavddus gávdno. Mis ii leat gal goassige doarvái bargit, muhto mii gal juoga láhkái čoavdit dan. Mii riŋget ruovttoluotta jus ii oktage vástit. Buohkat geat háliidit galget oažžut veahki Sámedikkis, dat lea hui dehálaš ahte olbmot geat háliidit jienastit čužžot Sámedikki válgajienastuslogus jus galget beassat jienastit. Okta olmmoš gii lea gahččan eret jienastuslogus, lea okta menddo ollu. Dát ii berre dáhpáhuvvat, ja dat ii galgga dáhpáhuvvat, ja mii fertet maŋŋil válggaid iskat mii lea geavvan, muitala Gaup.

– Ii leat vuosttaš geardde ahte min hálddahus lea barggus válgaeahkeda. Sámedikkis leat álohii leamaš bargit barggus válgaeahkeda, muhto dán háve fertiimet áiccalmahttit jienasteddjiide ahte veahkki lea fidnemis, loahpaha Rávdná Buljo Gaup.

Fáddásánit
Ođđasat

På forsiden nå