MEASTA GUOKTE PROSEANTTA: Čohkki sámediggepresideantta ođđa bellodat, Šiella, ii olat ollásit 2 proseantta jienain ge, go goalmmádasoassi jienain leat lohkkon. Govva: Astrid Helander

1,7 proseantta sámedigge­presidentii

Vibeke Larsena ođđa bellodat oaččui 1,7 proseantta jienain, dain vuosttaš bohtosiin. Larsen ii dieđe beassá go šat Sámediggái, muhto doallá ain movtta badjin.

21:34 Čakčamánu 11. beaivi 2017
Ođastuvvon: 12.09.2017 - 09:33

Vuosttaš válgaprognosaid mielde oažžu Šiella 1,7 proseantta jienain.

Šiela presideantaevttohas Vibeke Larsen lea ruovttus Áravákkis čuovvume válgabohtosiid.

– Lea goit buoret go maŋemuš oaiviliskosiin, lean positiivvalaš go manná buoret guvlui, muhto in leat vel jur Sámedikki áirras, lohká son.

Oaiviliskkadeapmi, masa Larsen čujuha, lea man Sentio čađahii Ávvira ja NRK Sámi ovddas borgemánu loahpas. Dan oaiviliskkadeamis oaččui Šiella 0,8 proseantta.

 

Goalmmádasoassi lohkkon

Dássážii eai leat go 33 proseantta jienain lohkkon.

– Dieđusge sávan ahte manná buorebut go buot jienat leat lohkkon, muhto go lea goalmmádasoassi, de rehkenasttán ahte bissu nu. Áirrasjuohku ii leat vel juhkkon, ja juohke jienas lea fápmu, nu ahte dan ii dieđe movt dat manná. Jus in beasa sisa Sámediggái, de in beasa sisa. Álbmot lea jienastan, lohká sámediggepresideanta.

 

Vuosttaš válga ođđa bellodagas

Šiella oassálastá vuosttaš háve sámediggeválgii. Lea Vibeke Larsen gii lea álggahan bellodaga, maŋŋel go guđii Bargiidbellodaga árabut dán jagi.

– Mii leat ain ođđa bellodat, ja leat olu fáktorat mat dás čuvvot. Mu mielas lea buorre ovdáneapmi, ja leat ovdánan maŋemuš oaiviliskkadeamis, geardduha Larsen fas.

Fáddásánit
Válggat 2017

På forsiden nå