DUTKET: Politiijat leat dutkame lihkohisvuođa mas nieiddaš vuddjui Guovdageainnus gaskavahku veaigin. Govven: Ellen Marianne Siri

– Vihtaniid dieđuid mielde vuddjui nieiddaš geaidno­rasttildan­báikkis

– Vihtaniid áicamat čujuhit dan guvlui ahte lihkohisvuohta dáhpáhuvai geaidnorasttildanbáikki alde, muitala Guovdageainnu politiija Anita Vasara.

11:36 Borgemánu 17. beaivi 2017
Ođastuvvon: 28.08.2017 - 11:40

Guovdageainnu márkanis vuddjui gaskavahkku nieiddaš. Son lea dál UNN buohcciviesus Tromssas, ja UNN dieđihii odne 12.00 ahte nieidda dilálašvuohta ii leat rievdan ievttá rájes, nieiddaš lea bahuid roasmmehuvvan, muhto lea stabiila.

Guovdageainnu politiijabálvá Anita Vasara muitala ahte vihtaniid dieđuid mielde lea nieiddaš vuddjon geaidnorasttildanbáikkis.

– Dat lea váttis dál dadjat maidige dan birra justa dál, lea go justa nu dáhpáhuvvan, muhto mis leat buorit  vihtanáicamat. In sáhte gal dál konkluderet, muhto sáhttá leat dakko vuojahallan, muitala Anita Vasara.

 

Oarje-Finnmárkku politiguovllu operašuvdnajođiheaddji Bjørn Gunnar Johnsen muitala gaskavahkku eahkes, ahte sii dutket dábálaš vugiid mielde lihkohisvuođa. Vuodjingoartta leat váldán biilavuoddjis, gii lea badjel 60-jahkásaš dievdu, nu go lea dábálaš dákkár lihkohisvuođain. Guovdageainnu politiijabálvá Anita Vasara muitala ahte dievdu gii vujii nieiddaža njeaiga lea báikki dievdu. 

– Leago vuoddji šohkas, dahje mo manná suinna?

– Politiijat eai dieđe justa dál maidige dan birra.  Mun in sáhte justa dál čilget detáljjaid dien áššis, loahpaha Anita Vasara.

 

Lihkohisvuođajoavku dutká

Anita Vasara muitala ahte Geaidnodoaimmahaga lihkohisvuođajoavku oasálastá dutkamii.
 

– Lihkohisvuođajoavku ii boađe gal Guovdageidnui dál, muhto biilla mii sáddet dutkamii dohko Áltái. Dat lea dan dihtii go lea stuorit lihkohisvuohta go olmmoš lea vuojahallan, de lea dábálaš rutiidna ahte mii dáhttut liigeveahki vuđolaččat dutkat dákkár áššiid, čilge Vasara.

UNN dieđihii 12.00 ahte nieidda dilálašvuohta ii leat rievdan ievttá rájes, nieiddaš lea bahuid roasmmehuvvan, muhto lea stabiila.

På forsiden nå