GÁIBIDEIGGA 2 MILJOVNNA BUHTADUSSAN: Bártnáža váhnemat gáibideigga suohkana máksit 2 miljovnna buhtadussan go čuoččuheaba máná givssiduvvon ja illastuvvon skuvllas. Govven: NTB Scanpix

Váhnemat vuoittáhalaiga dikkis

Váhnemat čuoččuheaba iežaska máná givssiduvvon ja illastuvvon Bearalvági skuvllas ja gáibideigga suohkana máksit 2 miljovnna buhtadussan bártnážii. Suohkan áššehuvai ii ge dárbbašan máksit maidege sudnuide, go diggegoddi oaivvilda skuvlla dahkan buot maid sáhti nu ahte mánás, geas lea ADHD, lea buorre dilli skuvllas.

13:50 Borgemánu 23. beaivi 2017

Bearalvági skuvla lei váidon go váhnemat oaivvildeigga ahte sudno mánná, geas lea ADHD, lea vásihan givssideami ja illasteami skuvllas. Váhnemat sivahalaiga skuvlla beare unnán dahkan dán áššis ja ahte skuvlla bargit galge ieža illastan máná, earret eará čuoččuheaba bargi lássen sudno máná hivssegii.

 

Gáibideigga birrasiid 2 millijuvnna

Váhnemat oaivvildeigga ahte sudno bártnáš lei stuora vahágiid ožžon daid dáhpáhusaid maŋŋel ja gáibideigga 1,8 miljovnna buhtadussan. Dasa lassin leigga gáibidan birrasii 350 000 ruvnno buhtadussan unniduvvon bargodietnasa ja fárrema goluid ovddas.

 

Ášši lei diggegottis miessemánus, muhto dál lea diggegoddi cealkán duomu.

 

Áššehuvvan

Bearalvági skuvla Finnmárkkus lea áššehuvvan givssideami ja illasteami sivahallamis. Nuorta-Finnmárkku diggegotti čuoččuha ahte Bearalvági skuvla lea dahkan dan maid galge nu ahte bártnáš, geas lea ADHD, galgá loaktit skuvllas. Suohkan ii dárbbaš máksit 2 miljovdnasaš buhtadusa, dieđiha NRK.

 

Dán birra čálii NRK álggos.

Fáddásánit
Ođđasat

På forsiden nå