DÁHTTU OKTASAŠ VÁLGABEAIVVI: NSR Niko Valkeapää, guhte lea goalmmátevttohas Gáiseguovllu válgabiirres, háliidivččii ahte sámediggeválggat dáhpáhuvvet oktanaga Suomas, Ruoŧas ja Norggas. Govvamontáša: Håkon Mosvold Larsen/Scanpix/Marie Louise Somby

Niko Valkeapää háliida oktasaš sámi válga­beaivvi

Sámi artista ja dál maid NSR-evttohas sámediggeválggas, Niko Valkeapää, oaivvilda ahte dál galggašii ásahit oktasaš válgabeaivvi Norgge, Suoma ja Ruoŧa sámedikkiide. Dát beaivi ii berre čuovvot Norgga stuorradiggeválggaid.

11:09 Borgemánu 28. beaivi 2017
Ođastuvvon: 30.08.2017 - 09:46

– Mii NSR:s háliidat oktasaš sámi válgabeaivvi Norgga, Ruoŧa ja Suoma sámedikkiide, dadjá Niko Valkeapää, guhte lea NSR goalmmátevttohas sámediggeválggas.

 

– Váilu oktasaš sámi almmolašvuohta

Norgga Sámiid Riikkasearvvi (NSR) politihka višuvdna lea ahte boahtteáiggis galgá leat oktasaš sámi almmolašvuohta ja ahte stádarájit eai galgga hehttet sámeálbmoga ovttasdoaibmama.

– Dál mis buori muddui váilu oktasaš sámi almmolašvuohta. Mis leat Ođđasat mat addet midjiide vejolašvuođa oaidnit mii dáhpáhuvvá riikkaráji nuppi bealde, ja mis leat iešguđetge konferánssat ja mis lea valáštallan, muhto muđui leat mis unnán arenat ovttasbargui, dadjá Valkeapää.

 

– Álkit ovttasbargat jus oktanaga válljejuvvojit

NSR-politihkkár Valkeapää lea riegádan Suoma beale Sámis, ja orru dál Norgga bealde.

Son oaivvilda ahte oktasaš válgabeaivi sáhttá leat buorre álgu ovttasbargui rájiid rastá.

– Jus Sámedikkit válljejuvvojit oktanaga ja seamma guhkes áigodahkii, de šaddá sidjiide álkibun ovttasbargat. Dasa lassin lean viissis ahte mis dalle sáhttet leat oktasaš almmolaš digaštallamat válgagiččus, áibba eará láhkai go mis dál lea, dadjá Valkeapää.

 

Oaidná hástalusaid

Dál leat Norgga bealde sámediggeválggat čadnon stuorradiggeválggaide. Valkeapää oaidná eará beliid maid sierra válgabeivviin sámedikkiide.

Son diehtá earret eará ahte máŋgasat ballet ahte válgasearvan njiedjá jus válgabeaivi sirdo.

– Ieš smiehtan ahte leat stuorra hástalusat čadnon dasa ahte válggat leat seamma beaivvi, earret eará go sámediggeválggat dávjá oalát jávket álbmotdigaštallamis go stuorradiggeválggat ožžot eanaš fuomášumi. Mii guoská teknihkalaš čađaheapmái válggaide, de ii leat datge dál váttisvuođaid haga go čuovvut stuorradiggeválggaid vuogi. Mun jáhkán mii nagodit ráhkadit buriid vuogádagaid iežamet válgačađaheapmái, loahpaha sámediggeevttohas Niko Valkeapää.

På forsiden nå