Čájáhusgovva: Ávvira vuorká.

Dál eai ávžžut jeahkáliid bordit lulde

Ollu boazoeaiggádat Nordlánddas lávejit mannat lulli-Norgii jeahkáliid bordit. Dál várohit bohccuid biebmamis jeahkáliiguin maid leat lulli-Norggas bordán.

11:02 Borgemánu 13. beaivi 2017
Ođastuvvon: 13.08.2017 - 11:08

Jeagelbordin ii leat vel gielddusin, muhto Chronic Wasting Disease-dávdda (CWD) hehtten dihte rávve Biebmobearráigeahčču ahte ii galgga biebmat bohccuid jeahkáliiguin mat leat bordon lulli-Norggas, dieđiha Nordlándda Fylkkamánni.

 

Rievdadit láhkaásahusa
Diibmá mearriduvvui ođđa láhkaásahus movt hehttet CWD-dávdda leavvat. Dál evttohuvvojit rievdadusaid láhkaásahussii, ja okta evttohusain lea ahte jeahkálat mat leat bordon lulli-Norggas, nu go ovdamearkka dihte Folldálas, ii galgga addot bohccuide. Láhkaásahus mielddisbuktá ahte jeahkáliiguin, mat leat bordon lulli-Norggas, ii leat lohpi biebmat davvi-Norgga bohccuid.

 

Ávžžuha garvit
Njuolggadusat leat hehtten dihte CWD-dávdda leavvama, mii sáhttá billistit boazodoalu jus leavvá. Nordlándda Fylkkamánni ávžžuha lulli-Norgga jeahkáliid garvit, vaikko dakkár gielddus ii leat vel doaimmas.

 

Árvvoštallát eará guovlluid
Jeagelbordin láve leat dehálaš Nordlándda boazodolliid gearggusvuhtii, čilge Fylkkamánni Biebmobearráigehččui.
– Mii leat maid ávžžuhan Biebmobearráigeahču iskat ja árvvoštallat guovlluid lulli-Norggas gos ain sáhttá jeahkáliid bordit, čállá Nordlándda Fylkkamánni neahttasiiddus.

 

På forsiden nå