Norga lea viimmat dohkkehan Kadcyla čižžeborasdávdadálkasa mii sáhttá buhcciid eallima guhkidit. Čájáhusgovva: Håkon Mosvold Larsen / SCANPIX

Čižžeborasdávdda dálkkas viimmat dohkkehuvvon

Norgga eiseválddit leat viimmat dohkkehan Kadcyla dálkasa mii sáhttá guhkidit čižžeborasdávdabuhcciid eallima. 

10:41 Borgemánu 15. beaivi 2017

Golbma jagi leat Norgga eiseválddit gulahallan dálkkasfitnodagain Rochen ovdal go dohkkehedje čižžeborasdávdda dálkasa Kadcyla.

Fitnodat lea gártan njeaidit hatti gávcci geardde ovdal Norgga eiseválddit mearridedje dohkkehit dálkkasgeavaheami Norggas. Ii leat dihtosis olu stáhta lea máksán dálkasa ovddas. 

– Lean hirbmat ilus go viimmat beassat fállat dálkasa Norgga buohcciviesuin, dát lea buorrin buhcciide, dadjá mearridanforuma jođiheaddji Lars Vorland. 

 

Guhkida eallima
Jus eará dálkkodeamis ii leamaš ávki, de fállet Kadcyla dálkasa nissonolbmuide geain lea HER2-positiv nammasaš čižžeborasdávda.

Dálkasa addet dušše jus eai sáhte čuohpadit buohcci dahje jus borasdávda leavvá.

Jahkásaččat sáhttet birrasiid 100 nissonolbmo dárbbašit dálkasa.

Kadcyla dálkasiin ii dearvvasmuva, muhto čižžeborasdávdabuhcciid eallin sáhttá guhkiduvvot sullii jahkebeliin. 

Olu eará riikkain, dego Ruoŧas, Danmárkkus ja Englánddas leat fállan dálkasa guhkit áigge, čállá NTB. 

På forsiden nå