II VUORDÁN NU OLUSIID: Guovdageainnu leansmánni lei nahkehan fiidnámus biktasiid badjelii go badjel 200 máná ja váhnema fitne doppe guossis. – In lean vuordán gal ahte ná olusat galge boahtit. Go geahčestin láseráigge iđđes, oidnen arvi lei, de ballen ahte olbmot eai soaitte de nu áŋgirat vuolgit gosage. Muhto juste diibmu oktanuppelogis, go rabaimet, de šávihedje olbmot, muitala son. Govven: Nils Johan Vars

Badjel 200 máná fitne «nástegálluid» guossis

Ikte lei mánáid beaivi Guovdageainnu leansmánnekantuvrras, ja doppe ledje badjel 200:s geat fitne. – In lean vuordán ná olu, lohká leansmánni ieš.

13:25 Borgemánu 27. beaivi 2017
Ođastuvvon: 28.08.2017 - 09:23

Juohke jagi bovdejit politiijat dábálaš olbmuid ja mánáid fitnat politiijakantuvrrain miehtá Norgga, gos de leat ásahan feara makkár doaimmaid ja guossohit gáhkuid ja sáftta.

Ikte ledje Guovdageainnu leansmánnekantuvrras rabas uvssat álbmogii.

 

Ii galgga issoras

Guovdageainnu leansmánni, Klemet Klemetsen, moddjái bealjis bealljái.

Veaháš várra maid go beasai borrat gáhkuid ja váffeliid, ja gáfe jugadit olles beaivvi.

Son muitala ahte lea somá beassat čájehit mánáide makkár politiijaid bargosadji lea.

– Ii galgga mánáide issoras politiijabargu. Dieđán sii várra jurddašit ahte lea amas ja duođalaš, muhto dál leat beassan fitnat ja oaidnit veaháš dáppe.

– Ja nu olugat go bohte, in dan lean gal vuordán, lohká son.

(Ášši joatká gova vulobealde)


– Dákkár lea oaidnit jus šaddá giddagassii Guovdageainnus, čájeha leansmánni. Govven: Nils Johan Vars

Geahččaladdat politiijan leat

Buohkat besse geahččalit leat politiijan doppe. Okta sis lei fargga 3-jahkásaš Áilu Mattheus.

Son beasai čohkkát politiijabiillas, ja gahpira vel oaivái bidjat, vai lea albma nástegállu.

(Ášši joatká gova vulobealde)

 


Fargga golmmajahkásaš Áilu Mattheus beasai etniinis, Margrethe Bals Utsiin politiijabiillas čohkkát. Govven: Nils Johan Vars

Suorbmamearkkaid gávdnat

Ovccejahkásaš Anders Eivind Buljo beasai fas geahččalit politiijaid goansttaid.

Son beasai geahččalit gávdnat suorbmamearkkaid, nu go albma politiijat dahket go ohcet suorbmamearkkaid.

Dan ovddas son oaččui diploma.

– Mun bidjen pulvariid dan báikái gokko suorbmamearkkat galge lea, ja de guštejin, ja de ihte suorbmamearkkat, muitala son.

(Ášši joatká gova vulobealde)


Ovcce jahkásaš Anders Eivind Buljo ožžon diploma go gávnnai politiijaid goansttaiguin suorbmamearkkaid. Govven: Nils Johan Vars

Máŋgga mánás lea várra miella politiijan šaddat go sturrot.

Go Ávvira mielbargi jearai Anders Eivindis áigu go politiijan šaddat go stuorru, de son vástidii ná:

– Juo!

 

Boahttevaš politiijat

Leansmánni lohká ahte lea hui somá go ná olu mánát fitne, ja sis sáhttá vel muhtun ge politiijan šaddat.

– Na mii dárbbahit eambbo sámegielat politiijaid, ja dan ii dieđe, dain sáhttá muhtun nahkeheame politiijabiktasiid badjelii go šaddet stuoraolmmožin, lohká Klemetsen vel loahpas, ja manná vel eambbo váffeliid borrat.


– Politiijabargu ii leat gal dušše váffeliid ja gáhkuid, gáfiin borrat, lohká Klemetsen ja njorresta alcces sáftta. Govven: NIls Johan Vars

 

Fáddásánit
Magasiidna

På forsiden nå