Arctic Race of Norway sihkkelastet Davvi-Norggas dán jagi. Gilvvut leat oassin Europatoures. Govven: Vegard Wivestad Grøtt / NTB Scanpix

Arctic Race čájeha Davvi-Norgga máil­bmái

Norgga Arctic Race sihkkelgilvu lágiduvvo Romssas ja Nordlánddas. Sihkkelgilvu čohkke olu olbmuid ja sáhttá maiddái geasuhit turisttaid Davvi-Norgii. 

15:05 Borgemánu 09. beaivi 2017
Ođastuvvon: 10.08.2017 - 11:44

Ihttin álgá Norgga Arctic Race sihkkelgilvu.

Sihkkelgilvu lea oassin Europatoures ja danin čoahkkanit ge máilmmibeakkán sihkkelastit Davvi-Norgii.

Sihkkelgilvu sáddejuvvo TV:s miehtá máilmmi, ja danin lea gilvvus stuora mearkkašupmi Davvi-Norgii. 

– Mátkeealáhusfitnodagat miehtá máilmmi besset oahpásmuvvat Davvi-Norgii TV-sáddagiid bokte. Min ulbmil lea šaddat seamma dehálažžan Norgii go Tour de France lea Frankriikii turismma oktavuođas, dadjá Arctic Race of Norway beaivválaš jođiheaddji Knut-Eirik Dybdal iežaset neahttasiidui. Varas guorahallan čájeha ahte sihkkelgilvvut lasihedje Norgga ealáhuseallimii dietnasa badjel 93 miljovnnain ruvnnuin diibmá. 

 

Geasuhit álbmotfeasttaiguin 

Norgga Arctic Race lágiduvvo Romssas ja Nordlánddas.

Sihkkelastit rasttildit máŋga gieldda, ja dan olis lágiduvvojit álbmotfeasttat.

Gilvvu vuosttaš oassi lea 156,5 kilomehtera. Vuolgga lea Andørjas Ivvárstáđiin ja moallabáiki lea Áhkánjárggas. 

– Áhkánjárggas lágidit earret eará spinninghárjehallamiid, sihkkelgilvvuid mánáid várás ja máinnassihkkelčájálmasa man mánáidgárdemánát leat ráhkadan. Dasa lassin lea Áhkánjárgga ráđđeviesus almmolaš rahpan, go ráđđeviessu lea ođastuvvon, čállet lágideaddjit iežaset Facebook siiddus. 

 

Suohkana čalmmustahttit 

Sámi suohkan Loabát dáhttu maiddái šaddat dovddusin máilmmis go Arctic Race sihkkelastit rasttildit sin gielddaráji. 

– Mii ávžžuhit buot suohkana ássiid čoahkkanit Deannjái duorastaga. Mii leat deaddilan Loabága suohkangalbba T-báiddiide, ja dáhtošeimmet buohkaid coggat dáid. Dasa lassin lea hui dehálaš ahte olbmot dollet suohkana čorgadin, ja livččii maid vuogas levget go sihkkelastit galledit min suohkana, čállá Loabága suohkan iežaset neahttasiidduin. 

 

Suodjalus guovddážis 

Arctic Race of Norway nuppi gilvobeaivvi sihkkelastet oasseváldit Vuotnasiiddas Siellagis Beardogoržái, mátki lea 177,5 kilomehtera. 

– Beardogoržžis lea suodjalusa girdišiljus moalla. Suodjalus doallá dan olis maiddái šovva, girdi- ja vuodjenfievročájáhusa ja suodjalusa musihkkakorpsa čuojaha, dieđihit lágideaddjit. 

 

Rahpet suoidnespáppaid

Lávvardaga sihkkelastet Arctic Race gilvaleaddjit Ivgumuotkkis Sállirii Romssas.

Ivgu suohkan lágida olu doaluid sihke Ivgumuotkkis ja Vuošvákkis. 

– Mii gilvalit golmmajuvllat sihkkeliiguin, vávvávovnnaiguin ja vázzinjorriiguin. Mii lágidit stohkosiid ja sihkkelgilvvuin mánáide ja mánáid galleda maiddái Elias-fanas. Dasa lassin rahpat suoidnespáppaid oaidnin dihtii maid daid siste leat čiegadan, dieđiha Ivgu suohkan. 

 

Stádaministtar oasálastá

Maŋimuš oassi dán jagi Arctic Race gilvvus lágiduvvojit Romssa gávpogis, sihkkelmátki lea 160,5 kilomehtera.

Nu go eará báikkiin ge, de lágidit Romssas maid sihkkelgilvvuid mánáid várás.

Romssa jazzfestivála bovde sihkkeljazzkonsertii. Sii leat čohkken sihkkeliid maid áigot geavahit čuojanassan.

Dieđihuvvo maiddái ahte Norgga stádaministtar Erna Solberg galleda Romssa gávpoga. 

 

Olu geainnut gitta

Arctic Race of Norway čađahuvvo geaidnoráigge, ja danin čuhcet gilvvut johtolahkii.

Stáda geaidnodoaimmahat dieđiha ahte gaskkohagaid giddejit geainnuid.

Sihke sin neahttasiidduin ja lágideddjiid kárttain sáhttá oaidnit goas ja gos geainnut leat gitta. 

– Jus leat johtimin guovlluin gos Arctic Race of Norway lágiduvvo, de ávžžuhit du plánet mátkki bures vai it gártta dárbbašmeahttun guhká vuordit, dadjá Stáda geaidnodoaimmahaga sadjásaš ossodatdirektevra Knut Øvervoll preassadieđáhusas. 

På forsiden nå