VUOSTTAŠ LUOSSA: Andreas Jensen Bæhr vuosttaš luossa dettii 7,1 kilo ja ii lean oggon guhká go dohppii. Priváhta govva.

– Lei somá goddit luosa

Mannan vahkku oaggungilvovuoitit leat dál vuorbáduvvon. 12- jahkásaš Guollelihku vuoiti muitalii iežas oggon 5 minuhta go luossa dohppii.

12:20 Suoidnemánu 18. beaivi 2017

Vahkku 28. vuorbádeapmi lea dál dahkkon, ja mannan vahkku guollelihkku vuoiti lea Andreas Jensen Bæhr ja Sáivagilvvu vuoiti lea Máret Julianne Gaup. Mannan vahkos ii searvan oktage Luossagonagas/-dronnet gilvui, nu eat sáhte vuorbádit das vuoiti. Go Ávvira journalista muitala Andreas Jensen Bæhrii ahte háliida jearahallat su, de čaibmá veahá ja dadjá «Ok».

– Dat lea hui buorre, lei somá goddit luosa, muitala Andreas ja orru hui movttet ja hirpmástuvvan.

 

Vuosttaš luossa

12-jahkásaš Andreas lei áhčiinis ja vieljažiinnis oaggunmátkkis Báttárjogas go gottii 7,1 kilosaš luosa oaggunstákkuin. Son lei movttet ja rámis go lei goddán nu stuorra luosa.

– Bálkestin bures johkii, ja de gottestin luosa, muitala Andreas ja čaibmá.

– Lea veahá váttis čilget, joatká Andreas.

– Lea vuosttaš luossa maid gottán jogas. Lei oalle lihkku go lei nie stuorra luosa vuosttaš háve go godden luosa, ja dat dohppii go ledjen oggon dušše 5 minuhta, muitala Andreas Jensen Bæhr.

 

Ballá ahte lea maŋimuš

Svein Ole Sandvik muitalii Ávvirii ahte rávdu mii dettii 3,22 kilo lei dat stuorámus maid lei goassige goddán stákkuin. Son lei dan dihte vuorjašuvvan ahte dat stuorra rávdut soitet jávkat Čuonjájávrris go Guovdageaidnu suohkan lea rahpan fierbmelobi jávrái. Jávri gos gottii rávddu lea oainnat dušše 800 mehtera guhkki ja govddimusa bokte birrasii 400 mehtera.

– Na de goit ii dárbbat dien jávrris šat doaivut guliid, ii jur dákkáriid goit. Gal jur diekkár unna jávrrážat gal galggaše bállet dušše oaggunjávrin. Fierbmut sáhttá mannat stuorra jávrriide, oaivvilda Svein Ole Sandvik.


STUORRA RÁVDU: Svein Ole Sandvik gottii 3,22 kilosaš rávddu stákkuin, ja ballá ahte soaitá leamaš dat maŋimuš stuorát mii váldui stákkuin. Priváhta govva.
 

Stuorát rávdu vel

Ávvir journalista lei measta sihkar ahte Svein Ole Sandvik galggai vuoitit mannan vahkku sáivagilvvu iežas 3,22 kilosaš rávdduin.

Dat ii dáhpáhuvvan dán háve, go 16-jáhkásaš Máret Julianne Gaup gottii vel stuorát rávddu. Dat dettii olles 4,9 kg, ja váldojuvvui firpmiin.

– Gilvu lea gilvu, ii dainna sáhte maidige, dadjá Svein Ole Sandvik go muitalan sutnje ahte lea vuoittáhallan Máret Julianne Gaupai sáivagilvvus.


VEL STUORÁT RÁVDU: Máret Julianne Gaup gottii vel stuorát rávddu go Svein Ole Sandvik. Priváhta govva.
 

Čiegus jávri

Máret Julianne Gaup čilge ahte son lei meahcis muhtin čiegus jávrris fierbmume iežas áhčiin go gottii dan hirbmat stuora rávddu. Dat ii lean gal seamma jávrris gos Svein Ole Sandvik oakkui.

– Lea suohtas ja buorre vuoitit, muitala Máret Julianne Gaup.

Ávvir journalista muitala ahte Svein Ole Sandvik lei sádden midjiide gova 3,3 kilo rávddus su ovdal.

– Jo mun oidnen dan, hui suohtas gilvalit, dadjá Máret ja čaibmá.

 

Gilvvuid vuoitu

Sáivagilvvu vuoiti Máret Julianne Gaup vuoitá vuoggapáhka ja Ávvir čeabetliinni ja son guhte lea goddán losimus rávddu loahpageahčen gilvvus vuoitá maid 2500 ruvnno ovddas skeaŋkakoartta man ISAN skohterfitnodat sponse. Dál lea Máret Julianne Gaupas hui stuorra vejolašvuohta vuoitit. Guollelihkku vuoiti Andreas Jensen Bæhr fas vuoitá oaggunstákku man FeFo sponse ja Ávvir čeabetliinni. Buohkat geat oassálastet mánáidgilvvus leat mielde vuorbádeamis mas sáhttá vuoitit 1500 ruvnno árvosaš skeaŋkakoartta.

Luossagonagas/-dronnet gilvui ii searvan oktage mannan vahkos, muhto buohkat geat servet dan gilvui leat mielde vuorbádeamis mas sáhttá vuoitit 5000 ruvnno árvosaš skeaŋkakoartta. Dan luohkkái sáhttá searvat luosain man lea stákkuin goddán, ja sáhttá leat goddán dan vaikke makkár jogas.

Fáddásánit
Guoimmuheapmi

På forsiden nå