GONAGASLAŠ GUOSSI: Dronnet Sonja ja festiválajođiheaddji Karoline Trollvik váccašeame Riddu Riđus. Govven: Risten Marja Anne Gaup


Gonagaslaš guossi Riddu Riđus

Duorastaga suoidnemánu 13.beaivvi Dronnet Sonja guossodii Riddu Riđđu ja rabai dan jagáš festivála sártniin

13:24 Suoidnemánu 14. beaivi 2017
Ođastuvvon: 14.07.2017 - 13:26

Lei ollu olmmoš čoahkkanan geahččat go Norgga Dronnet Sonja ollii Riddu Riđđu festiválii. Lei leamašan hui fiinna dálki olles beaivvi, muhto de arvigođii. Arvi ii aŋkke bissehan festivála gussiid movtta ja beroštumi oaidnit ja deaivvadit Dronnegiin.

De boahtá

Festiválaguossit čuččodedje ja gierdevaččat vurde dan erenoamáš guossi, ja viimmáskedje go oidne biillaid mat bohte maŋŋálagaid, ja vel movttáskedje vel eambbo go Dronnet Sonja lávkii biillas olggos. Álggos son deaivvadii festivála jođiheddjiin Karoline Sofie Tveitnes Trollvikain ja eará festivála njunušbargiiguin geat sávve sutnje bures boahtima festiválii. Das ledje vel guokte Olmmáivákki máná geat beasaiga liđiid skeŋket Dronnegii.


BURES BOAHTIN, DRONNET: Riddu Riđđu njunušbargit ja guokte «lieđđemáná» válde bures vuostá dronnega go go ollii Olmmáivággái. Govven: Ina Marie Logje
 

Oahpásnuvvame Riddu Riđuin

Dronnet Sonja beasai vázzit Riddu Riđđu festivála guovddáššiljus, ja humadii duojáriiguin ja beasai oaidnit sin dujiid, mat ledje earret eará Olmmáivákki sámi duojit, Ruošša duojit ja Alaska duojit. Guoktenuppelohkái jahkásaš Mathea beasai guossohit rabárbermáli Dronnegii dollagáttis.
 

– Lei hui somá go bessen guossohit máli Dronnet Sonjai. Mun in álggos jurdilan ge ahte lean Dronnegii guossoheame máli. Sus lei nu fiinna luondu ja orui dego dábálaš olmmoš. Easkka maŋŋel mun fuobmájin ahte die han lei Dronnet ja de mun maid fuobmájin makkár erenoamáš vásáhusain mun dál riggon, muitala Mathea.


NJÁLGGA HERSKOT: Mathea beasai guossohit rabárbermáli earenoamáš guossái Govven: Ina Marie Logje
 

Almmolaš festiválarahpan

Ovdal go Dronnet Sonja manai lávdde ala, dajaiga festivála jođiheaddji Trollvik ja festivála stivrrajođiheaddji Christina Henriksen moadde sáni. Go de viimmat Dronnet Sonja lávkii lávdde ala doallat iežas sártni, de festivála guossit spežžo gieđaid ja illudedje hirbmosit su sártni gullat.

Maŋŋel go lei sárdnidan, čuojahii Mette Henriette čáppa šuoŋaid maid son lei ráhkadan Dronnet Sonjai ja su galledeami váste.


ALMMOLAŠ RAHPAN: Dronnet Sonja sártnui lávdde nalde ja sávai buohkaide buori festiváladoaluid Govven: Ina Marie Logje
 

«Mu ruoktu lea mu váimmus»

Sártnis Dronnet Sonja muittaša Áillohačča ja su beakkán sániid «Mu ruoktu lea mu váimmus ja dat čuovvu mu».
– Mun lean hui buorre dán oassái Norgga riikkas. Stuora poehtas Valkeapääs lea riekta, váibmu lea ruovttus - ja dál mii leat ruovttus, loahpaha Dronnet Sonja.


LÁVLO: Riddu Riđđu mánáidfestivála lávlunjoavku lávllui Dronnet Sonjai riegadánbeailávlaga. Govven: Risten Marja Anne Gaup
 

Buorre čalmmustahttit

Riddu Riđđu stivrrajođiheaddji Christina Hendriksena mielas lea hui buorre go Dronnet Sonja boahtá Riddu Riđu rahpat. Su mielas dat čájeha ahte Dronnet Sonja berošta sámiin ja son oaivvilda dat soaitá mielddisbuktit ahte Norgga álbmot maid fuobmá Riddu Riđđu festivála, ja dat buktá positiiva fuomášumi sámiide ja eará álgoálbmogiidda mat lávejit oassálastit festiváladoaluin.


HUMADII DUOJÁRIIGUIN: Duojárat ja juoigi rámpojedje Dronnet Sonja go bijai áiggi sidjiide, ja bisánasttii singuin humadit. Govven: Risten Marja Anne Gaup
 

På forsiden nå