Anders Sunna leage okta dain viđa sámi dáiddáriin geat leat hástaluvvon boahtit márkkogilážiidda ráhkadit sámi dálááiggedáidaga. Govven: Preassagovva

Festivála birastuvvo dáidagiin

Sámi festivála Márkomeannu lea hástalan vihtta sámi dáiddára boahtit ráhkadit sámi dálááiggedáidaga. Festivála sadjásaš buvttadeaddji, Anne Henriette Hætta Reinås, lohká ge iežas sakka illudit oaidnit go leat geargan buktagiin.

09:20 Suoidnemánu 14. beaivi 2017
Ođastuvvon: 14.07.2017 - 12:39

Márkomeannu hástala Joar Nango, Unn Kristin Laberg, Anders Sunna, Matti Aikio ja Katarina Pirak Sikku hábmet diŋgojuvvon buktaga, mii galgá leat dáidda luonddus mii lea festivála birrasis.

 

Alla vuordámušat

– Dán jagáš diŋgojuvvon buktagii leat alla vuordámušat, ja ovttas dáiddáriiguin geat Sámis leat muhtin dat ovddimusat bázze- ja installašuvdnadáidagis, váldá márkkomeannu dáidaga olggos galleriijain ja vuolggaha gilážiidda, dieđiha festivála preassadieđáhusas.

 

Hástalit sámi dáiddáriid

– Márkomeannu lea hástalan dán 5 sámi dáiddára hábmet visuála dáidaga lundui ja luonddus márkkogilážiin, dadjá sadjásaš buvttadeaddji Anne Henriette Hætta Reinås.

 

#EANAN

Festivála čilge ahte sii leat ge bidjan dán jagáš diŋgojuvvon buktagii nama #EANAN, ja namma muitala makkár jurdda buktaga duohken lea. Jurdda lea namalassii ahte geavahit ealli luonddu oassin buktagis:

– Márkomeannu lea álggahan #EANAN:in barggu measta golmma jagi áigi, ja doaivumis de buvtta gárvejuvvo geasi mielde. Jurdda lea ahte galgá gárvvis go festivála rahppo suoidnemánu 27.beaivvi. Dál galget ge ovdal márkomeannu dáiddárat Joar Nango, Unn Kristin Laberg, Anders Sunna, Matti Aikio ja Katarina Pirak Sikku bargat iežaset dáidagiiguin márkkogilážiin. Dáidda galgá šaddat unnit eanet bistevažžan guovllus.

 

Dáiddárat iešguđet báikkiin

– Mis lea leamaš nu lihkku ahte leat fidnen fárrui moadde dain eanemus miellagiddevaš dáiddáriin Sámis. Dan lassin ahte sii leat iešguđet báikkiin eret Norggas, Ruoŧas ja Suomas, de lea sis iešguđetgelágan duogáš ja vásáhusat, muitala Hætta Reinås

Ovdamearkka dihte de lea Unn Kristin Laberg báikkálaš dáiddár, ja Matti Aikio ges gullá boazodoallobearrašii Vuohčus, Suomabeale Sámis, čilge Hætta Reinås.

 

Hætta Reinås muitala vel loahpas ahte sii leat bargan guhká dáinna diŋgojuvvon buktagiin ja sii illudit sakka oaidnit go dat čađahuvvo.

 

EANAN lágiduvvo doarjagiin

Márkomeannu EANAN lágiduvvo doarjagiin Norgga Sámedikkiin, Davvi Kulturoktavuođain, Kulturráđiin ja Nordlándda fylkkain. Márkomeannu lágiduvvo Gállogiettis Evenášši suohkanis suoidnemánu 27.-29. beivviid.

På forsiden nå