ČÁJÁHUS GOVVA: Dálvadasa Allasullui ja dan birastahtti čáhceviidodahkii lea 13.7.2017 ásahuvvon moratorio, mainna servet Ellos Deatnu! -lihkadussii. Govven: Preassagovva.

Ellos Deatnu lihkadus viidu

Dálvadasa Allasullui lea mannan duorastaga ásahuvvon moratorio, mainna servet Ellos Deatnu! -lihkadussii.

11:18 Suoidnemánu 14. beaivi 2017
Ođastuvvon: 14.07.2017 - 11:58

Allasuolu lea Suoma bealde riikarájá Deanuleagis Dálvadasa bokte.
Čearretsuolu, gosa Ellos Deatnu! -joavku gieskat ásahii moratorio lea ges Norgga bealde riikarájá, ná dahká Allasullo moratorio dán riikkaidgaskasaš áššin.

 

Sávvá earát ceggegohtet moratorioid

– Deanu ášši gulla midjiide buohkaide guovllu olbmuide. Lean galledan Čerretsullo ja gullen ahte buorre vuohki doarjut lihkadusa livččii ieš cegget moratorio. Leat ceggen muhtin Dálvadas olbmuiguin moratorio Allasullui, Čearretsullo moratorio joatkkan. Sávan, ahte earát maid čájehit oainnuideaset ja ceggegohtet moratorioid guovlluidasaset. Lea dehálaš čájehit, ahte eat dohkket ođđa Deanu soahpamuša. Ellos Deatnu! -lihkadus galgá stuorrut stuorra rávdnjin. Dainna lágiin olbmot earáge guovlluin leat ožžon áigái rievdadusaid, cealká Outi Pieski Dálvadasas.


Outi Pieski. Govven: Astrid Helander (vuorkágovva)

Eai dovda guovllu kultuvrra

– Ii oro áibbas riekta, ahte olbmot, geat eai dovdda guovllu kultuvrra ja árbevieruid, dahket mearrádusaid guvlui. Fierbmebivdu lea muđuige geahppánan issorasat Deanu alde maŋimuš 30-jagi, ja ođđa sohkabuolvvat eai hálddaš šat nu viidát gealbbu mii dárbbašuvvo dan ollašuhttimis. Ráddjehus eastá maiddái sámeskuvllain juohke jagi ollášuhtton árbevirolaš guolásteami oahpahusa, joatká Sylvi Rasmus, nuppi báikkálaš soga ovddastáddji.


Sylvi Rasmus. Govven: Inga Marie Guttorm (vuorkágovva)

Duššada sápmelašvuođa
Dálvadasa olbmuid mielas ii oro riekta, ahte bartaturisttaide addojuvvojit eanet vuoigatvuoðat Deanu čázadahkii. Sii čuoččuhit, ahte vaikko olggobeal olbmot leatge oastán eatnamiid de árbevuoigatvuođaid sii eai sáhte oastit, dat čuvvot árbbis. Dálvadasas lea fuolla dán báikkálaš árbbi ja vuoigatvuođaid sirdašuvvamis boahttevaš buolvvaide.

– Deanusoahpamuš sáhttá dagahit dan, ahte Deanu guolástankultuvra loahpas duššá ja seammás duššá maiddái sápmelašvuohta, giella ja kultuvra. Mátta-Suomas mánát veahkehallet dálu bargguin, muhto min mánát eai oba beasa joga ala. Ii muge gánda oaččo boahtit muinna veahkkin buođđut. Dathan lea olles olmmošlašvuođa vuostá, cealká Vuovdaguoikka guolástangotti ovdaolmmoš ja okta Allasullo moratorio ásaheaddjiin Erke Ánde, Antti Katekeetta.


Antti Katekeetta. 
Govven: Astril Helander (vuorkágovva)

Ellos Deatnu! joavku vuostálastá ođđa Deanu soahpamuša ja ovddida sámi iešmearrideami ja báikkálaš hálddaseami Deanuleagis. Jovkui gullet báikkálaš sápmelaččat goappat beale Deanu ja riikkarájáid ja eará berošteaddjit.

På forsiden nå