Suohkan­stivra bivdá eise­válddiid unnidit goaskin­náli

Guovdageainnu suohkan deattuha cealkámušas ahte boazodoallu lea suohkana váldoealáhus, ja vahágat mat leat boazodoalus, čuhcet maid suohkanii.

12:31 Geassemánu 19. beaivi 2017

Maiddái Guovdageainnu suohkan lea buktán cealkámuša goaskinvahátáššiide mat dán giđa leat bures čalmmustuvvon, medias ja sosiála mediain.

Suohkanstivra dohkkehii ovttajienalaččat cealkámuša man opposišuvdna evttohii.

– Guovdageainnu suohkan vuordá ahte vásttolaš eiseválddit čuovvolit vuđolaččat daid olu dieđuid goaskinvahágiid birra. Suohkan áinnas deaivvada eiseválddiiguin dán áššis, cealká Guovdageainnu suohkan.

 

– Ii dohkálaš ahte boazoeaiggát galgá biebmat goaskinnáli

Suohkan cealká ahte vuorjašuvvet go boazodolliin leat nu stuora vahágat sihke gonagas- ja mearragoaskimiidda. Sii deattuhit ahte Guovdageainnu váldoealáhus lea boazodoallu, sihke bargosadjemeari ja ekonomiija ektui.

– Stuora vahágat boazodoalus čuhcet negatiivvalaččat Guovdageainnu suohkanii. Suohkanstivra bivdá dasto vásttolaš eiseválddiid álggahit doaimmaid, unnidit goaskinnáli. Ii leat dohkálaš ahte boazoeaiggáda buvttadus, miesit, galget biebmat goaskinnáli, cealká suohkan.

 

Háliidit árbevirolaš máhtu hálddašeapmái

Suohkan oaivvilda ahte boazodoalus leat doarvái hástalusat ovdalaččas, ja goaskinvahágat leat lassinoađđin boazoeaiggádiidda ja sin bearrašiidda.

– Guovdageainnu suohkan lea oaidnán ilgadis duođaštusaid sosiála mediain movt goaskimat goddet misiid. Goaskinnálli orru áibbas bearráigeahču haga, ja áidna vejolašvuohta orru álggahit doaimmaid mat hehttejit vahágiid. Dálá hálddašeapmi ii oro deaivame dan maid boazoeaiggádat vásihit ealu luhtte. Danne ferte vásáhus ja árbevirolaš máhttu váldot mielde beaivválaš hálddašeapmái, cealká suohkan.

Fáddásánit
Ođđasat

På forsiden nå