LODDEN: Boazopolitiijaid hoavda Inger Anita Øvregård muitala Ávvirii ahte eai leat beassan gozihit giđđaloddema nu go ledje áigon. Dán jagi lea baicce unnit bearráigeahčču leamaš go diibmá. Čájáhusgovva: vuorkágovva

– In ipmir manne gozihit, go oba gillejit ge

Loddejeaddji Nils N. N. Eira lohká Boazopolitiijaid bearráigeahčču dagaha ahte loddejeaddjit dovdet iežaset dego bahádahkkin. Son ballá árbevirolaš giđđalodden sáhttá oalát jávkat dan geažil.

16:02 Geassemánu 08. beaivi 2017

Giđđat lea loddenáigi Guovdageainnus, ja bivdoáigodat lea dál mannáme loahpa guvlui. Loddenáigodat nohká lávvordaga gaskaijaáigge. Maiddái dán jagi leat boazopolitiijat bearráigeahččan loddejeddjiid.

Nils N. N. Eira lea leamaš loddeme dán giđa, ja son atná unohassan go Boazopolitiijat dárkilit gozihit sámi árbevirolaš bivddu, ja lohká dovdat iežas bahádahkkin go politiijain lea čavga bearráigeahčču.


LODDEJEADDJI: Nils N. N. Eira. Priváhta govva.

– In ipmir manne gozihit, go oba gillejit ge. Gávdno olu eará kriminalitehta, ii dát min loddebivdu leat nu olu. Eat mii báže nu olu ahte dat dahká maide, lohká Eira.

Giđđaloddemis ožžot 101 bivdi báhčit oktiibuot 150 čáhcelotti. Lottiid maid besset báhčit leat fiehta, stuoravuojaš ja goalsi. Lea lohpi báhčit 100 stuoravuojaža ja 50 eará lotti. Bivdu álggii miessemánu 30. beaivvi.

 

Ballá lodden nohkká

Nils N. N. Eira ballá ahte árbevirolaš lodden boahtá nohkat, politiijaid dihte.

– Leat olusat geat eai oba duostta ge šat loddet, go politiijat leat doppe. Geavvá nu ahte sii geat leat hárjánan oažžut loddemállása, eai oaččo šat dan, lohká Eira.

Son čilge ahte lodden lea dego luopmu oallusiidda, ja luopmodovdu manná eret go politiijat bearráigehččet sin.

– Jus bázát lotti, de ovttatmanos balahit ahte leat báhčán eará lotti go maid lea lohpi. Jus varran lea fanas de doivot mii leat lotti báhčán, muhto mii goit bivdit guliid maid. Ovdal láviimet lávostallat, dál ii duostta šat nohkkat ge, lea unohas jus politiija lea fáhkka das go leat oađđime. Šaddá juohke iđida ruoktot vuolgit, go ii arvva oađđit doppe jus politiijat bohtet, lohká son.

Eira deattuha ahte eai leat mat ge lobihisvuođaid go lea loddeme, muhto čilge ahte lea njuolgut unohas go garrasit bearráigehččet bivddu.

 

Unnit bearráigeahčču go diibmá

Boazopolitiijaid hoavda Inger Anita Øvregård biehttala ahte lea olu bearráigeahčču, ja baicce lohká ahte dán jagi lea unnit go maid ledje plánen, buohccindieđihemiid geažil. Plána lei čađahit lihka olu bearráigeahču go diibmá, muhto dán jagi lea baicca unnit bearráigeahčču.


BOAZOPOLITIIJAID HOAVDA: Inger Anita Øvregård. Vuorkágovva: Inga Marie Guttorm

– Resurssaid maid leat geavahan leat 2 dahje 3 dábálaš bargobeaivvi. Mis lea dan vahkku leamaš okta joavku olgun, lohká Øvregård.

Bearráigeahčus isket politiijat leat go bivdiin buot báhpirat ortnegis, leat go rievttes lottiid báhčán ja leat go doallan bivdomeari.

– Mii eat vávjje buohkaid bahádahkkin, muhto duođalaš bivdiin galget buot áššit ortnegis. In ipmir dien kritihka. Lea oahpes ášši ahte mii čađahit bearráigeahču, lea juste seamma ealgabivddus maid, lohká boazopolitiijaid hoavda.

 

Hoavda behtton go njurgo lea báhččon

Sus ii leat lohku galle bivdi leat dárkkistuvvon, muhto golmmas váidojit vearjolága vuođul go eai lean nu gohčoduvvon «plomberingat» bissuin, maid vearjoláhka gáibida.

Politiijajoavku lea maid gávdnan ovtta báhččon njurgo govddodeame eanus. Njurgo ii leat lohpi bivdit giđđaloddemis.

– Ferten lohkát ahte lean behtohallan. Dat addá Guovdageidnui heajos beaggima giđđaloddema ektui, dat lea beare heittot, lohká Øvregård.

Porsáŋggus leat gávdnon 2-3 stuorračuotnjága mat ledje bážahallan. Daid maid ii leat lohpi giđđat báhčit. Son balaha dat leat Guovdageainnu bokte girdán Porsáŋgui.

– Lea eahpidahtti go stuorračuotnjágat jápmet báhčinháviiguin. Dan boahtit čuovvolit, go ii leat dohkálaš ahte lottiid maid ii leat lohpi báhčit, báhččojit.

 

– Bivdokultuvra ahte eai doahttal njuolggadusaid

Øvregård jáhkká giđđaloddemis dáhpáhuvvet lobihisvuođat maid politiijat eai nagot čuvgehit.

– Politiijat eai leat geavahan resurssaid bearráigeahččat giđđaloddema ovdal 2014 rájes. Go bivdokultuvra lea nu ahte eai doahttal bivdoáiggiid eai ge njuolggadusaid, de mii fertet bearráigeahččat ja dárkkistit ahte njuolggadusaid čuvvot. Olbmot ožžot leahkit ovttaoaivilis dahje eai, muhto lága ja láhkanjuolggadusaid galgá čuovvut. Min álgojurdda lea ahte olbmot čuvvot lágaid, muhto lean maid ožžon gažaldaga dárkkistit go mii lobihis bivddu, ja sáhttá leat nu ahte fertet leat olgun de go olbmot oaivvildit ahte fertet leat olgun.

 

– Dušše Guovdageainnus vásihit dan

Facebookas lea giđđaloddenjoavku gosa muhtumat čállet ja dieđihit gos politiijajoavku áin lea áiggis áigái. Dan lea Øvregård maid oaidnán, ja lohká ahte jus olbmuin fal lea beroštupmi almmuhit gos politiijat áin leat, de fertejit dan dahkat.

– Mis ii leat čiegadit, ja dat ii leat váttisvuohtan midjiide. Muhto ferten lohkát ahte lea duššo Guovdageainnus gos dan vásihit, lohká boazopolitiijaid hoavda.

Fáddásánit
Ođđasat

På forsiden nå