GUOKTE NEAHTA: DAB-kanálat gullojit iešguđet ládje, go leat guokte iešguđet sáddenneahta. NRK radioneahtta gokčá 99,7 proseantta álbmogis. Kommersiála neahtta gokčá 92,8 proseantta. Govva: Digitalradio Norge

Dábálaš boasttuipmárdus DAB-gokčamis

– Leat oallugat geat eai dieđe ahte leat guokte riikaviidosaš DAB-neahta, ja dat guokte neahta gokčaba goabbat ládje, lohká Ole Jørgen Torvmark.

16:17 Geassemánu 19. beaivi 2017
Ođastuvvon: 20.06.2017 - 09:11

P4:s, Radio Norges ja NRK:s leat joavkkut luottaid alde dan viđa fylkkas gos FM-neahtta giddejuvvo gaskavahkku. Joavkkut galget iskat DAB-gokčama, veahkehit guldaleddjiid ja galledit vuvdiid ja biiladivohagaid. Dan dieđiha Digitalradio Norge preassadieđáhusas.

– Joavkkut vásihit dávjá ahte olbmot eai dieđe ahte NRK:s ja kommersiála kanálain leat iešguđet DAB-fierpmádagat, ja dain fierpmádagain lea erohus gokčamis, lohká Digitalradio Norge beaivválaš jođiheaddji Ole Jørgen Torvmark.

 

Galgá gokčat 99,7 proseantta

NRK DAB-neahtta gokčá measta 99,7 proseanta álbmogis. Kommersiála kanálat gokčet 92,8 proseantta álbmogis.

– Muhtumat konkluderejit beare jođánit ahte DAB-neahtta ii gullo, vaikko NRK-kanálat soitet gullot, lohká Torvmark.

Stuoradiggedieđáhusas «Radiomedia digitaliseren» gáibidedje eiseválddit ahte NRK DAB-neahtta galgá gokčat 99,5 proseantta álbmogis, ja kommersiála neahtta fas 90 proseantta. NRK heaitá sáddemis FM-neahta bokte Oarje- ja Nuorta-Agderis, Rogalánddas, Hordalánddas, ja Sogn ja Fjordanes gaskavahkku geassemánu 21. beaivvi.

Fáddásánit
Ođđasat

På forsiden nå