Govven: SÁVE/ Storyline Pictures

Mánáid ja nuoraid filbma­prošeavttat vuoru­huvvojedje

Internašunála Sámi Filbmainstituhtta (ISFI) lea juolludan doarjaga guđa filbmaprošektii.

15:31 Miessemánu 08. beaivi 2017
Ođastuvvon: 10.05.2017 - 11:20

Internašunála Sámi Filbmainstituhtta (ISFI) oaččui 11 filbmabuvttadanohcama njukčamánus ja oktiibuot ohce 2.5 miljovnna ovddas sámi filmmaide.

Dán háve vuoruhii ISFI filbmaprošeavttaid mánáide ja nuoraide, go gávdnojit nu unnán sámegiel filmmat dán gehččiidjovkui.

Oktiibuot juolluduvvui 950 000 ruvnno guđa filbmaprošektii.

 

Historjjalaš filbma

– Mii illudit sakka ođđa sámi mánáidfilmmaide, ja erenoamážit vuosttaš sámi guhkesfilbmii mánáide ja nuoraide. SÁVE lea guhkesfilbma man Jens Martin Mienna lea čállán ja Khalid Maimouni, Storyline Pictures áigu buvttadit, muitala Internašunála Sámi Filbmainstituhta direktevra Anne Lajla Utsi.

– Dál áigot giehtačállosa vel válbmet ja ruhtadit filmma. ISFI:s illudit dan beaivái go sáhttit sámi ja eará mánáid bovdet historjjálaš premierii, muitala  Utsi.

 

Cannesii


Internašunála Sámi Filbmainstituhta direktevra Anne Lajla Utsi.
 Govven: Nils Johan Vars (vuorkágovva)

Filmma buvttadeaddji, Khalid Maimouni, lohká iežas leat áibbas sihkarin ahte dát erenomaš muitalus šaddá sihke fámolažžan ja somán oallut gehččiide sihke Norggas ja muđui máilmmis.

– Dál mii váldit mielde prošeavtta Cannes filbmafestiválii, gávdnan dihte ovttasbargoguimmiid, geat sáhttet veahkkin midjiide ollašuhttit dán ehpalaš filmma, dadjá Maimouni.

 

Juolludeamit

Internašunála Sámi Filbmainstituhtta lea juolludan čuvvovaš filbmadoarjagiid cuoŋománus 2017:

SÁVE
Vuosttaš sámi guhkesfilbma mánáide ja nuoraide: 200 000 ruvnno
Čálli: Jens Martin Mienna, buvttadeaddji: Khalid Maimouni, Storyline Media

 

GUMPE
Oanehisfilbma: 70 000 ruvnno
Buvttadeaddji: Davas Film Ken Are Bongo

 

MOOMINS AT CHRISTMAS
Guhkesfilbma dubbejuvvon davvisámegilli: 150 000 ruvnno
Buvttadeaddji: Filmkompaniet Alpha AB Oy, Tom Carpelan, dubben bagadalli: Sara Margrethe Oskal.

 

BEAIVVI BÁRDNI
Sámegiela teksten: 30 000 ruvnno
Teksten davvisámegillii. Giraff Film AB, buvttadeaddji Anna Bjørk bokte.

 

MÁINNASGIISÁ
Animašuvdnaráidu mánáide: 200 000 ruvnno
Buvttadeaddji: John Erling Utsi, Sámi Kompania AB

 

SÁNIT
Babyfilmmat: 300 000 ruvnno
Buvttadeadji ja bagadalli: Ann Film/Ann Holmgren.

Oktiibuot juolludii Internašunála Sámi Filbmainstituhtta 950 000 kr doarjagiid ođđa sámi filmmaide.

 

Ovdánahttindoarjagat

Dasa lassin leat čuvvovaš filmmat ožžon ovdánahttindoarjagiid dán rádjái 2017:s.

UTSI guhkesfilbma manus, Susanne Hætta 30 000

FAAMOE, drámáráidu, Bauta Film AB 60000

NUORTALAČČAT, dokumentára, Siivet AS 60 000

BIELLU NJUOVČČA, Marja Bål Nango/Ingor Bål Nango 30 000

GIITU ÁNUT, oanehisfilbma, Olve Aslaksen 25 000

EN MANN I ET FUKTIG TELT I HAGEN, Egil Pedersen,
guhkesfilbmamanus 60 000

Oktiibuot ovdanahttindoarjagat 2017: 265 000 ruvnno

Buot doarjagat dán radjái 2017 1 215 000

 

Boahtte juolludeapmi lea čakčamánus dán jagi.

 

På forsiden nå