Preassagovva

Juoigan­suopmanat Ijahis Ijas

Ijahis Idja háliida čalmmustahttit máŋggabealatvuođa sámi oktasaš musihkkaárbevierus.

08:57 Miessemánu 19. beaivi 2017
Ođastuvvon: 22.05.2017 - 10:10

Dán jagi lea Ijahis Ija festivála fáddá «Juoigansuopmanat». Festivála háliida ovdanbuktit sápmelaččaid rikkis vokálamusihkkašlájaid valljivuođa. Dan dieđiha festivála preassadieđáhusas.

– Temá lea dán jagi áigeguovdil, go lea gollan 100 jagi vuosttaš davviriikkalaš sápmelaččaid čoahkkaneamis, čuožžu preassadieđáhusas.

Festivála háliida musihka bokte čalmmustahttit ahte sápmelaččain lea oktasaš musihkkaárbevierru, fuolakeahttá sierralágan báikkálaš stiillain.

Dáhpáhus lea fáddákonsearta masa juoigit miehtá Sámi servet, buot njealji riikkas.

 

ÁRA vuosttaš háve Suomas

Ijahis Idja lágiduvvo Anáris, ja dán borgemánu lea njealjenuppelogát festivála. Vuosttaš artisttat leat juo almmuhuvvon. Simon Issát Marainen boahtá čuojahit iežas joavkkuin, ÁRA.

Joavku lea almmuhan vuosttaš albuma jo 2010:s ja lea olu johtán. Ođđa cd-skearru «Girkásit» almmuhuvvui guovvamánu dán jagi.

Joavkku musihkas ovttastuvvet árbevierru ja inspirašuvdna, ustitvuohta ja liekkusvuohta, luohti ja improvisašuvdna.

– ÁRA musihkka lea duođaid áidnalunddot. Dat leat mátki čađa sániid ja šuoŋaid duovdagiid, cealká Ijahis Ija festiválaplánejeaddji Oula Guttorm preassadieđáhusas.

 

– Ráiddus ravgu boazu ii doahttal gean ge

Ravggon joavku galgá maid vuohččan lávket Ijahis Ija lávdái.

Sii leat johtán miehtá Eurohpá maŋemuš jagiid. Joavku lei Sámi Grand Prix lávlunoasi 2015:s, ja sii bohte goalmmádin.

Seamma jagi sin šuokŋa «In dárbbat appelsiinnaid» lei Yle Sámi radiosáddagiid eanemus čuojahuvvon lávlla. Jagi maŋŋelis joavku almmuhii vuosttaš skearru «Ráji Ravddas».

– Ravggona musihkas ja lyrihkain gieđahallo dálámáilmmi jallodat ja olmmošvuođa ruojusvuohta. Maiddái sin iežaset ruohttasat ja luonddu fápmu leat guovddážis. Ravggon lea ráiddus ravgu boazu, mii ii doahttal geange! čállá Ijahis Idja preassadieđáhusas.

Fáddásánit
Kultuvra

På forsiden nå