MANAI BURES: Miesáš lea fas ealus, muitala Mihkkal Máhtte Gaup. Priváhta govva

– Ii lean jur luotta ala guoddán

Nu lohká boazodoalli Mihkkal Máhtte Gaup video birra mii ikte lei Ávvira neahttasiiddus.

11:39 Miessemánu 06. beaivi 2017
Ođastuvvon: 08.05.2017 - 09:08

Ikte čáliimet Ávviris miesi birra mii lei riegádan luotta ala, ja báhcán álddus.

Boazodoalli Mihkkal Máhtte Gaup čilge ahte ii lean gal jur nu dáhpáhuvvan, muhto miessi lei oalle aiddo šaddan dalle go video lei filbmejuvvon.

– Lei seamma beaivvi guoddán, ovdalaš go rastá luotta jođiimet. Jur aiddo bissu čuožžut, lohká Gaup.

 

Dearvvaš ja ealus

Mihkkal Máhtte lea oappáinis ja vieljainis johtime geasseorohahkii Válgenjárgii. Ikte rasttildedje luotta Gárggoluobbalis, ja doppe lei ge dát dáhpáhus.

Miessi lei báhcán luotta ala go johte rastá. Ledje maid nu olu biillat ja olbmot mat dagahedje ahte áldu ii duostan viežžat miesi.

– Lei min eatni miessi, ja dat gal lea dál dearvvaš ja ealus, lohká son.

Boazodoallit ledje gal šaddan veahkehit miesi oanehažžii, rehkii gurpat dan botta go johte eret luotta luhtte. Go fas gávdne álddu, de luite miesi.

Miessi falui, ja áldu maid fuolai fas miesi.

På forsiden nå