LOKTET LULLI-SÁMEGIELA: Raarvihke suohkan lágida geassemánu giellalokten seminára. Govas lulli-sámi duodji. Vuorkágovva.

Áigot nannet lullisámegiela

Raarvihke suohkan háliida nannet lullisámegiela Norgga ja Ruoŧa beale Sámis, ja lágidit giellanannenseminára.

17:53 Miessemánu 08. beaivi 2017
Ođastuvvon: 09.05.2017 - 10:40

Raarvihke suohkan lágida giellafierpmádatseminára geassemánus. Ulbmil seminárain lea čalmmustahttit lullisámegiela, ja ráhkadit arena gos giella hubmo, gullo ja oidno.

 

Ráhkadit fierpmádaga

Lullisámi giellaguovddážat Gïelem nastedh, Aajege, Sámi giellaguovddáš Ruoŧa bealde ja Gïelearnie ovdanbuktet iežaset ođđa giellareaidduid semináras. Lea maid sáhka oahpporeaidduin.

Bovdehusas, man suohkan lea sádden, čállet ahte áigot oasseváldiid oahpistit movt loktet giellabargguid, ja movt sáhttet veahkkin ráhkadit fierpmádaga gos lea sihke Lulli-Sámi giella- ja kulturmáhttu.

Seminára bistá guokte beaivvi, ja lea Raarvihke servodatviesus. Sámi giellaguovddáš, Ruoŧa Sámediggi, Aajege suohkan ja Snåasen suohkan leat mielde lágideamis.

Fáddásánit
Ođđasat

På forsiden nå