GEATNOGAHTTON: – Vuođđoláhka ja riikkaidgaskasaš konvenšuvnnat, maid Norgga stáhta lea vuolláičállán, geatnegahttet Norgga eiseválddiid váldit ovddasvástádusa sámi ealáhusaid suodjaleamis, dadjá sámediggeráđđi Per Mathis Oskal. Govven: Åse Pulk/Sámediggi

Vuordá boazodoalu árvvus adnot

– Stáhta ja gielddaid eiseválddit galget suodjalit sámi boazodoalu luondduvuđđosa, maiddái go lea sáhka ollu vearroruđaid viežžamis stuorra elfápmoplánain, dadjá sámediggeráđđelahttu Per Mathis Oskal.

14:32 Cuoŋománu 20. beaivi 2017

Sámediggeráđđelahttu Per Mathis Oskal registrere ahte Finnmárkui lea stuora beroštupmi ásahit bieggamilluid. Dan dieđiha preassadieđáhusas.

– Vuođđoláhka ja riikkaidgaskasaš konvenšuvnnat, maid Norgga stáhta lea vuolláičállán, geatnegahttet Norgga eiseválddiid váldit ovddasvástádusa sámi ealáhusaid suodjaleamis, dadjá sámediggeráđđi Per Mathis Oskal.

 

Buoremus guovllut goappaš ealáhusaide

Boahtá ovdan ahte Norggas leat Finnmárkkus buoremus bieggadilit. Seammás dadjet guoskevaš orohagat ahte seamma areálat leat buoremus guohtoneatnamat.

– Stáhta ja gielddaid eiseválddit galget suodjalit sámi boazodoalu luondduvuđđosa, maiddái go lea sáhka ollu vearroruđaid viežžamis stuorra elfápmoplánain, dadjá Oskal.

Son lea gieskat ožžon dieđuid bieggafápmorusttega ásaheami birra Deanu ja Davvisiidda gielddaid gaskii. Goappaš gielddain leat sávvan bures boahtima prošeavttaide.

 

– Eiseválddit vajálduhttet

Oskala mielas lea suorggahahtti go jurddašit gieldda ovddasvástádusa sámi kultuvrra ja ealáhusa luondduvuđđosa suodjaleamis.

– Mun registreren ahte doaibmabidjooamasteaddji almmolaččat leat dovddahan ahte prošeavttat eai čuoza guohtonguovlluide. Buot huksemat boazodoalloguovlluin čuhcet sidjiide geat geavahit guovlluid ovddežis. Gažaldat lea man stuorra negatiivvalaš váikkuhusat šaddet. Mun oaivvildan ahte stáhta ja gielddaid eiseválddit vajálduhttet iežaset dieđihangeatnegasvuođa go dánlágan čuoččuhusat bállejit orrut vuosttalkeahttá, dadjá Oskal.

 

Čoahkkinastán orohagain

Sámediggeráđđi lea čoahkkinastán Lágesduoddara orohagain, masa bieggafápmorusttet čuozašii eanemus. Sis leat giđđa-, geasse-, ja čakčaeatnamat dán guovllus. Orohaga mielas lea prošeakta stuora duohtadeapmi sin guovlluin.

Preassadieđáhusas čállá ahte Sámediggi háliida geavahit ođasmuvvi energiija, muhto dainna eavttuin ahte ii buvttaduvvo sámi ealáhusaid oskálii.

– Dasto vásihuvvo dat duolbmamin go ođđa ceavzilis ja ruoná energiijabuvttadeapmi heađušta ceavzilis biebmobuvttadusa, mii lea dahkan ahte olbmot leat ásaiduvvan lagaš guovlluide sohkabuolvvaid čađa, dadjá Oskal.

 

– «Boazodoallu bisseha buot ovdáneami»

Go Oskal diehtá orohagain lea vánis ruhta ja muđui resurssaid maiguin dáistalit sisabahkkemiid vuostá, de ávžžuha plánejeddjiid, eiseválddiid ja priváhta aktevrraid árvvus atnit boazodoalu.

– Jos ovddasvástideaddji eiseválddit eai huma boazodoalu ášši almmolaččat, de loahpa loahpas šaddá nu ahte daddjo «boazodoallu bisseha buot ovdáneami». Oaivvilduvvo ahte sámi boazodoallu caggá ilu, go duohtavuođas ealáhus dáistala birgejumis beale, dadjá Oskal loahpas.

Fáddásánit
Ođđasat

På forsiden nå