EAI ČUOJAT: Dáid beassážiid eai beasa Báktehárjjis eai ge Kárášjoga valáštallanhállas gullat Sančuari musihka. Joavku lea bissehan buot plánejuvvon konsearttaid daid beassážiid, buozalmasvuođa geažil. Vuorkágovva: Ovlla Gaup

«Stállan­gazza» ii gullo dáid beassážiid

Sančuari lea bissehan buot plánejuvvon konsearttaid daid beassážiid. Joavku ii čuojat Guovdageainnus ii ge Kárášjogas.

11:38 Cuoŋománu 03. beaivi 2017
Ođastuvvon: 03.04.2017 - 14:26

Sančuari duođašta ahte leat bissehan plánejuvvon konsearttaid buozalmasvuođa geažil. Dađi eambbo eai hálit kommenteret.

Sančuari galggai čuojahit Kárášjogas skilleduorastaga ja Guovdageainnus guhkesbearjadaga. Dál leat goappaš konsearttat bissehuvvon.

 

Vuolidit hatti

– Sámi Musihkkafestivála bealis mii ipmirdit, eallin ja dearvvuohta lea deháleabbo go konsearta. Lea hui šállošahtti go Sančuari ii šaddan mielde, muhto mii ipmirdit bures, lohká Sámi Musihkkafestivála buvttadeaddji Ol Johan Gaup.

Sančuari galggai čuojahit guhkesbearjadaga Báktehárjjis.

Mannan lávvordaga ožžo Sámi Musihkkafestiválas dieđu ahte konsearta bissehuvvo.

Sámi Musihkkafestivála ii viečča eará artistta Sančuari sadjái, muhto sii baicca vuolidit bileahttahatti go okta unnit artista lea.

Lávdi ii báze guorosin, guhkesbearjadaga leat vihtta artistta mat galget čuojahit. Johan Ivvár Gaup, ISÁK, SlinCraze, Ailu Valle ja Amoc.

– Mii árvvoštalaimet viežžat ođđa artistta, muhto de livččiimet gáržžahallan áigái. Mii leat duhtavaččat artisttaiguin mat leat. Rap-artisttat leat maid plánen ovttasbarggu ja áigot hirpmástuhttit gehččiid, dat šaddá somá, lohká Gaup.

 

Gávdnan sadjásaš joavkku

«Urbredden fra Tana og Karasjok» boahtá Sančuari sadjái Kárášjogas.

Kárášjoga festiválaid buvttadeaddji Kenneth Eliassen lea duhtavaš go nu johtilit nagodedje gávdnat artistta Sančuari sadjái.

– Mii oaččuimet sotnabeaivvi dieđu, ja dál mánnodaga mis lea juo eará joavku sajis. Mii nagodeimmet gávdnat buori čovdosa, jođánit, lohká Eliassen.

«Urbredden fra Tana og Karasjok» čuojahii Tråante 2017 doaluin vuosttaš háve.

Sii bohtet Sančuari sadjái skilleduorastaga Kárášjoga valáštallanhállas. Joavkkus leat earret eará Hartvik Hansen, Anne Lise Varsi, Amund Johnskareng ja Leif Jakobsen.

Muđui konsearta čađahuvvo nu go plánejuvvon, Felgen Orkester ja Kevin Boine čuojahit maid valáštallanhállas.

Fáddásánit
Kultuvra

På forsiden nå