Norggas leat ipmilbálvalusat main sámegiella lea oassin, lassánan goasii beliin 2014:s gitta 2016 rádjai. Dat lea Sámi Girkoráđi jođiheaddji Sara Ellen Anne Eira (unna govaš) mielas hui illudahtti. Čájáhusgovva: Silje Malene Varsi/ Sámi Girkoráđi preassagovva.

Sáme­giella lassánan Norgga girkus

Norggas leat lassánan sihke ipmilbálvalusat ja searvegottit mat leat geavahišgoahtán sámegiela ipmilbálvalusain maŋemus guovtti jagis.

12:15 Cuoŋománu 08. beaivi 2017
Ođastuvvon: 10.04.2017 - 08:54

– Lea hui illudahtti midjiide oaidnit ahte sámegielat dávjjibut geavahuvvojit ipmilbálvalusain. Gullat iežas giela ipmilbálvalusain mearkkaša hui ollu, lohká Sámi girkoráđi jođiheaddji Sara Ellen Anne Eira preassadieđáhusas.

 

1745 ipmilbálvalusa

Raporterejuvvon ipmilbálvalusat main sámegiella lea oassin, leat goasii beliin lassánan 2014:s 2016 rádjai. Searvegottit raporterejedje 892 sámegielat ipmilbálvalusa 2014:s, ja dát lohku lei lassánan 1745 ipmilbálvalussii 2016:s.

 

Lassánan 95 proseanttain

Norgga girkus guovddášgirkolaš ráđiid jahkeraporta čájeha ahte sámegielat dávjjibut geavahuvvojit Norgga girku ipmilbálvaluseallimis. Lassáneapmi 95 proseanttain lea measta duppalastin ipmilbálvalusloguin main sámegiella gullo dáid jagiid.

 

– Váldá duođas sámegiela

Searvegottiid lohku, mat leat váldán atnui sámegiela seamma áigodagas, lea maid sakka lassánan. 2014:s ledje 80 searvegotti ja 2016:s fas 131 searvegotti mat atne sámegiela ipmilbálvalusain.

– Dát čájeha ahte Norgga girku, mii lea álbmotgirku, váldá duođas ahte sámegiella ja dárogiella leat guokte ovttaárvosaš giela Norggas. Lea vuogas oaidnit go ovdána positiivvalaččat, erenoamážit go mii diehtit ahte váilot ollu sámegielat báhpat ja eará girkolaš bargit, lohká Sara Ellen Anne Eira.

 

– Sámegiella čalmmustahtto

– Buorre oahppu sámegielas ja sámi kultuvrras girkolaš bargiide dagaha maid ahte sámegiella čalmmustahttojuvvo girkolaš dáhpáhusain, ja sámegielat bargit leat mielde loktemis giela árvvu, lohká Eira.

Fáddásánit
Ođđasat

På forsiden nå