ČIEZAS GUĐA OASSEVÁLDÁI: Ann Jorid Henriksen lea ferten geassádit Sámi Grand Prix lávlungilvvus. Dasto eai leat go guhtta oasseváldi lávlunoasis. Ávvira vuorkágovva

Okta SGP-oasseváldi ii searvva gilvui

– Ferte dearvvašvuođa ovddemussii bidjat, lohká buvttadeaddji Ol Johan Gaup.

09:54 Cuoŋománu 12. beaivi 2017

Ann Jorid Henriksen galggai vuosttaš háve čuožžut Sámi Grand Prix(SGP) lávddi alde dán beassášlávvordaga. Nu ii šatta, go son lea ferten geassádit gilvvus.


II SEARVVA: Ann Jorid Henriksen galggai beassášlávvordaga vuohččan čuoččohit Sámi Grand Prix lávddi ala. Dál lea šaddan geassádit gilvvus.

– Ann Jorid lea njalkkihan, ja dojii oalggis dávtti, muitala Sámi musihkkafestivála

buvttadeaddji Ol Johan Gaup.

– Moai letne humadan, ja doavttir lea maid lohkán ahte ii ábut seaŋggas mannát eret, son ii ábut lihkadit. Lea hui suddu, go sus lei fiinna lávlla. Ii leat beare beare go lea bákčasiid siste. Dearvvašvuođa ferte ovddemussii bidjat, lohká Gaup.

 

Lei okta liige oasseváldi lávlunoasis

Ann Jorid Henriksen galggai searvat «Áigi lea áiggi buorrin» lávlagiin. Son lea ovdal Ávvirii muitalan ahte lávlla lea áššiid birra mat gusket ráhkisvuhtii, nu go duostilvuohta, gáđašvuohta ja dieđusge ráhkisvuohta.

Dán jagi lei Sámi musihkkafestivála válljen váldit čieža lávlaga mielde SGP lávlunoassái. Dábálaččat lávejit guhtta lávlaga lávlunoasis, ja logi luođi juoiganoasis.

– Maid don jáhkat, mii diđiimet ahte juoga boahtá dáhpáhuvvat, vástida Ol Johan Gaup go Ávvir jearrá manne ledje váldán čieža lávlaga.

– Ii heađisge, joatká son.

– Mis lei hui váttis válljet duššo guhtta go ledje nu issoras buorit lávlagat, mii eat nagodan válljet duššo guhtta. Diibmá ledje 11 luođi juoiganoasis, ja orui heiveme vuohkkasit dán jagi váldit ovtta liige lávlaga mielde, lohká son.


– HUI SUDDU: Sámi musihkkafestivála buvttadeaddji Ol Johan Gaup mielas lea suddu go Ann Jorid ii šatta searvat, go su mielas lei hui fiinna lávlla. Vuorkágovva: Inga Marie Guttorm

 

Álgán hárjehallamiiguin

Sámi musihkkafestivála ii viečča eará oasseváldi Ann Jorid Henriksen sadjái.

– Mii leat juo álgán hárjehallát, ja mii joatkit daiguin guđain geat leat mielde. Dat gal manná bures, de leat guhtta lávlunoasis ja logi juoiganoasis, lohká Gaup.

Ávvir lea geahččalan oažžut Ann Jorid Henriksena ságaide, muhto ii leat lihkostuvvan.

Fáddásánit
Sámi Grand Prix

På forsiden nå