JUSS-STUDEANTA: Elle Martine Eira lea juss-studeantta Romssas, ja áigu ain kombineret spábbačiekčama skuvlavázzimiin, go dál lea soahpan šiehtadusa Porsáŋggu spábbačiekčanjoavkkuin. Priváhtagovva.

Ii máša vuos bidjat spábbačiekčanskuovaid hildui

Son lei mearridan bidjat spábbačiekčanskuovaid hildui, ja heaitit, muhto de bođii Porsáŋggu spábbačiekčanjoavkkus nu buorre fálaldat, ahte ii máššan dan vejolašvuođa manahit.

11:14 Cuoŋománu 12. beaivi 2017

Elle Martine Eira lea guhká beroštan spábbačiekčamis, ja fárrii ge Romsii maŋŋel nuoraidskuvlla vázzit spábbačiekčanskuvlla.

Romssas rahpasedje eambbo vejolašvuođat spábbačiekčanmáilmmis, ja beasai gitta vuosttaš divišuvdnii Fløya spábbačiekčanjoavkkuin.

Gieskat almmuhii Eira ahte guođđá Fløya spábbačiekčanjoavkku, ja vállje heaitit spábbačiekčamis skuvlla geažil.

 

Buorre fálaldat

Ii mannan guhká ovdal go Porsáŋggu spábbačiekčanjoavkku hárjeheaddji, Reidulf Høybakken, válddii oktavuođa ja attii buori fálaldaga.

– Álggos ledjen meinen oalát heaitit spábbačiekčamis skuvlla geažil, ja dušše fokuseret skuvlavázzima. Go PIL:s lei buorre fálaldat mii heive munnje hui bures, sihke árgabeaivvi ja skuvlavázzima ektui, de válljejin dahkat šiehtadusa singuin. Dasa lassin mun leat olu oahppásat joavkkus, ja mu mielas lea hui somás joavku geaiguin jáhkán loaktit, dadjá Eira.

 

Hárjehallá Romssas

PIL joavkkus orrot sullii logi nieida Romssas, geat doppe hárjehallet fárrolaga. Sii hárjehallet oktii vahkkui Furuflaten spábbačiekčanjoavkkuin, mii dagaha ahte sii eai dárbbat vuolgit Levdnjii juohke háve go lea hárjehallan.

– Go mun orun Romssas, de mus ii leat vejolašvuohta vuolgit Levdnjii hárjehallamiidda, nu ahte lea heivehuvvon vai mii sáhttit hárjehallat dáppe Romssas, čilge son.

 

Ráidočiekčan

Nuppi divišuvnna nissonjoavkkuin álget ráidočiekčamat loahpas dán mánu. Eira ii oainne čiekčamiid hástalussan, go eanas čiekčamat Porsáŋggu spábbačiekčanjoavkkus leat Romssa guovlluin.

– Go eanas čiekčamat šaddet Romssas ja dáppe lahkosis, de in dárbbat nu olu mátkkoštit, ja de lea mus vejolašvuohta searvat čiekčamiidda, dadjá son.

– Lean šiehttan hárjeheddjiin ahte čievččan dain čiekčamiid maid sáhtán. Mus leat olu eksámenat dál giđđat, mii dagaha ahte ferten olu áiggi bidjat dasa. Muhto lihkus lea joavku hui fleksibel, ja beasan čiekčat go alccen heive.

 

Illuda

Eira lohká alddis juo oahppásiid iežas ođđa joavkkus, ja illuda čiekčagoahtit fárrolaga. Sus aŋkke eai leat nu alla vuordámušat.

– Mihttu lea dieđusge čiekčat nu bures go sáhttit, ja geahččalit birgehallat bures. Sávan ja doaivvun iežas loaktit bures joavkkus, go lea hui fiinna ja somás joavku. Šaddá somá, loahpaha Elle Martine Eira.

Fáddásánit
Valáštallan

På forsiden nå