EAMBBO STUDEANTTAT: Prorektor Wenche Jakobsen illuda go Romssa universitehtas leat historjjálaš olu ohccit máŋgga suorggis. Govas son čuččoda Romssa universitehta studeanttaiguin Sandra Charlotte Olsen, Sara Linn Lanng Fauskerud ja Lina Erika Öberg. Govva: Inger Elin Utsi

Garra gilvu sajiid alde

Eambbo studeanttat háliidit álgit Romssa universitehtas gazzat oahpu. 7 714 leat ohcan beassat álgit, ja dat lea 6,61 proseantta lassáneapmi.

08:44 Cuoŋománu 21. beaivi 2017

Leat 7714 geat leat Romssa universitehta bidjan iežaset vuosttaš vuoruheapmin go leat ohcan beassat alit ohppui dán jagi. Ohcanáigemearri lei cuoŋománu 15. beaivvi.

Oktasaš sisaváldima logut čájehit ahte lea 6,61 proseantta lassáneapmi Romssa universitehtas, riikaviidosaččat fas leat 2,7 proseantta lassánan ohcamat. Dan dieđiha Romssa universitehta preassadieđáhusas.

– Ohcanlogut čájehit ahte Norggas beroštit fágalaš kvalitehtas ja bargovejolašvuođain go ohcet skuvllaide. Mis eat leat goasse leamaš ná olu ohccit, ja mii illudit go lassáneapmi boahtá ávkin máŋgga báikái. Hársttáin lea 15 proseantta lassáneapmi, lohká prorektor Wenche Jakobsen.

 

– Šaddá gilvu

Bivnnuheamos oahput Romssa universitehtas leat ain dearvvašvuođaoahput. Dán jagi leat maid oahpaheaddjeoahpuin ja guolástanfágain eambbo ohccit go ovdal.

– Diibmá ledje 317 ohcci min oahpaheaddjioahpuide, dán jagi leat 485. Dat lea dehálaš olles riikaoassái. Mii diehtit ahte Davvi-Norggas dárbbašit 4000 oahpaheaddji boahtteáiggis, ja lea hui buorre go leat eambbo ohccit go oahpposajit. Máhttoministara fuomášupmi lea leamaš buorre rekrutteremis. Dál šaddá gilvu oahpposajiid alde, lohká Wenche Jakobsen.

 

Guolásteapmi bivnnut

Guolástanfágat leat maid bivnnuhat davvin. Guolástan- ja mearradoalludieđa bachelorii leat 221 ohcci, ja dušše 45 oahpposaji. Lassáneapmi lea 80 proseantta.

– Dat lea hirbmat buorre. Dás šaddá maid gilvu. Lea ealáhus mii lea stuorrume, ja gelbbolašvuohta lea dárbbašlaš, lohká Jakobsen.

 

Nuorra ohccit

Leat nuoramus ohccit geat háliidit Romssa universitehtii álgit.

58 proseantta ohcciin leat gaskal 19- ja 23 jahkásaččat.

65,5 proseantta sis geat leat Romssa universitehta bidjan vuosttaš vuoruheapmin leat davvi-norgalaččat.

Muđui Norggas leat eanemus ohccit Oslos, Akershusas ja Lulli-Trøndelágas.

Fáddásánit
Ođđasat

På forsiden nå