NUORVU II DOALLAN: Áltálaš Emilie Kristoffersen válddii čielgaseamos golli lávvordaga Saami Ski Races. Maŋŋel lei son hui ilus. Govven: Nils Johan Vars

Buohcan nuorvvuin, liikká vuittii 30 minuhtain

Son lea measta guokte vahku buohcan nuorvvuin, dál son vuittii Saami Ski Race 90 kilomehter guhku čuoigangilvvus nissonluohká measta 32:in minuhtain.

16:14 Cuoŋománu 02. beaivi 2017
Ođastuvvon: 03.04.2017 - 09:44

Emilie Kristoffersen ii leat mihkke «sotnabeaičuigiid», son lea earret eará vuoitán bronssa 2015:s Norggameasttirgilvvu stafeahtas, ja maid ovddastan Norgga World cup čuoigangilvvuin.

Son lei ge 31 minuhta ja 51 sekundda ovdalis su gii nubbin bođii.

 

Buohcan

Álttá čuoigi, Emilie Kristoffersen, muitala ahte son lea nu ilus go vuittii, ja erenoamážit go oba šattai ge čuoigat Saami Ski Race.

 – Mun lean measta guokte vahku buohcan nuorvvuin. Ii lean oba sihkar ge ahte bessen searvat čuoigamii. Lei nu buorre go liikká šadden čuoigat, ja maid go vuiten, lohká son, ja geahčestallá bohtet go eará čuoigit.



Diibmobeliin

Kristoffersenis ii lean makkár ge ágga geahčestallat maŋás, go son lei dat geas šattai buot čielgaseamos golli dán jagáš Saami Ski Races.

Son časkkii nissoniid 90 kilomehter čuoigamis badjel diibmobeliin, ja ádjánii 4:41:13.

Nubbin bođii ráisalaš Amalie Triumf (17), guhte lei hirbmadit váiban.

Triumfas lei 11 minuhta buoret áigi go sus gii goalmmádin šattai.

Fáddásánit
Valáštallan

På forsiden nå