BIVDET DEPARTEMEANTTAS VEAHKI: Boazodoallostivra sádde boahtte vahkku reivve Eanandoallodepartementii mas bivdet veahki Finnmárkku boazodolliide. Berit Marie E. Eira(govas) ovddidii dan boazodoallostivrras. – Min stivrras ii leat nu eaŋkil duššo luvvet ruđa, dan ferte loktet badjelii min dási, lohká son. Govven: Ovlla Gaup

Boazodoallo­stivra bivdá veahki departe­meanttas

Ikte lei boazodoallostivrras čoahkkin, ja doppe mearridedje Eanandoallodepartemeanttas bivdit veahki Finnmárkku boazodolliide, gos dál lea heajos guohtondilli.

14:18 Cuoŋománu 21. beaivi 2017
Ođastuvvon: 21.04.2017 - 14:24

Ávviris leat čállán heajos guohtondili birra mii dál lea Finnmárkkus. Olu sajiin lea olu muohta ja cuoŋu, eará sajiin fas jikŋon eana, ja bodneskárta.

Boazodoallit ohcalit veahkkedoaimmaid, go šaddet biebmat ealuid, muhtumat fas biillaiguin johtit mearragáddái gos soaitá buoret ealát.

Duorastaga lei boazodoallostivrras čoahkkin, gos stivraláhttu Berit Marie E. Eira ovddidii dán ášši.

– Olles stivra čájehii buori ipmárdusa, ja válde duođas ášši. Muhto min stivrras ii leat nu eaŋkil duššo luvvet ruđa, dan ferte loktet badjelii min dási. Evttohus lea čállit hoahpporeivve Eanandoallodepartementii, ja min jođiheaddji logai son vel riŋge eanandoalloministarii. Mii dieđus stivrras eat sáhte lohpidit maide, muhto lea buorre signála go stivra čájehii dan mađe duođalaš ipmárdusa, lohká Eira.

 

– Mannan eambbo ruhta go rehkenastán

Reive galgá sáddejuvvot Eanandoallodepartementii farggamusat, gos stivra bivdá ruđalaš doarjaga boazodolliide geat šaddet biebmat ealuid ja biillaiguin doalvut ealu mearragáddái.

– Dál leat olbmot golahan eambbo go dábálaččat dahket. Ja lea leamaš sáhka orohagaid heahtefoanddain, ja dat leat buohkain. Muhto jáhkán dál go čuožžilii vel vearrát dilli go láve, de leat golahuvvon dat ruđat, ii leat šat báhcán liigeruhta. Lea mannan eambbo ruhta go maid ledje rehkenastán, go oallugat leat šaddan eambbo biebmat go lávejit ja árabut álgit. Oallugat mat eai láve biillaiguin vuojihit, sidjiide šaddá eambbo gollu dainna.

 

Loga maid: Heajos guohtun dagaha heađi

 

Sávvá čakčii

Eira sávvá maid dilli mii dál lea, váldo vuhtii go čakča boahtá.

– Dát sáhttá čuohcat čavčča vuovdinbohtosii, jus šaddá mieseheapme. Dat čuohcá vel eambbo ruhtabursii. Soitet jus lea dáhttu ja vejolašvuohta, kánske sáhttet ložžet gáibádusaid jus nu vearrái lea dilli. Eat mii dieđusge dieđe, muhto boazodoalli lea čeahppi einnostit.

Son jáhkká veahkki boahtá.

– Jus veahá ge ipmárdusa čájehit, de jáhkán ahte boahtá veahkki. Leat ovdal sáhttán hoigadit veahki, šaddá jearaldat man olu ja movt rehkenastet dan. Sávvamis čájehit ipmárdusa ja fuomášit lea erenoamáš dilli, lohká Eira.

 

Deaivvada boahtte vahkku

Boazodoallostivrajođiheaddji Lodve Solholm ii astta go humihit Ávviriin, muhto son muitala ahte stivra váldá ášši duođalaččat. Boahtte vahkkus sáddejit reivve departementii.

Son lea Osloi mánnodaga, ja dalle galgá deaivvadit eanandoalloministariin.

– Mii oaidnit dan mađe olu signálaid ahte fertet juoidá dahkat. Muđui sáhttet stuora hástalusat čuožžilit, lohká son.

Solholm ii dieđe makkár buriid sáhttet vuordit, muhto lohká dat šaddá stáhtaráđi duohkai.

Fáddásánit
Ođđasat

På forsiden nå