23 189 RIEVSSAHA: Rievssatbivdit njeide 23 189 rievssaha mannan áigodagas. Gárdumiin fidnejedje 91 rievssaha olles áigodagas. Govva: FeFo

Beali unnit rievssa­hiid báhčán

Mannan áigodagas godde oktiibuot 23 189 rievssaha Finnmárkkus. Dat lea sullii beali unnit go ovddit áigodagas.

07:47 Cuoŋománu 03. beaivi 2017
Ođastuvvon: 19.07.2017 - 14:49

Finnmárkku smávvafuođđobivddus godde oktiibuot 23 189 rievssaha 2016-2017 áigodagas.

Smávvafuođđobivdit doibmii bidje badjel 35 000 bivdojándora maŋimuš áigodagas.

Finnmárkkuopmodagas loahpahuvvui rievssatbivdu njukčamánu 15. beaivvi.

 

Eambbo koarttat go ovdal, muhto unnit rievssahat

Eai leat goasse vuvdon ná olu bivdokoarttat Finnmárkkus.

Oktiibuot vuvdojedje 8 731 bivdokoartta mannan áigodagas. Unnit go bealli vuvdojedje Finnmárkku ássiide, 3 835 koartta.

Seammás njeide bivdit sullii beali unnit rievssahiid go ovddit áigodagas. Dalle lei olahus Finnmárkkus.

 

Gárdon 91 rievssaha

Meahccehálddašeaddji Even Borthen Nilsen lohká bivdiid leat leamaš govttolaččat.

– Bivdoáigodagas godde oktiibuot 16 178 rievssaha ja 7 011 girona, ja olles 94 proseantta doibmii biddjon bivdobeivviin leat raporterejuvvon. Lea hui duhtadahtti ja čájeha man oskkáldasat ja ovddasvástideaddjit smávvafuođđobivdit leat, dadjá Nilsen, geas lea váldoovddasvástádus smávvafuođđobivddus FeFos.

Gárdumis leat dasa lassin fidnen 91 rievssaha.

 

Eai muitte raporteret

Logut čájehit ahte Guovdageainnus njeidet eanemus rievssahiid.

Dattetge joatkašuvvá smávvafuođđubivdu Finnmárkkus, go bivdet riebana, garjjá, miŋkka ja buoidaga. Riebanbivdu bistá cuoŋománu 15. beaivái.

– Sii geat bivdet smávva boraspirežiid eai dárbbaš doibmii bidjat bivdokoartta ovdal bivddu, danne eai oaččo automáhtalaččat dieđu ahte fertejit raporteret bivddu. Dan geažil vajálduhttet oallugat raporteret bivddu. Muhto dat lea dehálaš máhtolašvuđot hálddašeapmái, danne ávžžuhit mii bivdiid raporteret, lohká Even Borthen Nilsen.

 

Fáddásánit
Ođđasat

På forsiden nå