EARÁ GUOVLLUIDE MAID: Sámi bivdo- ja meahcástansearvvi jođiheaddji Johan Ingvald Hætta lohká stuorit servviin lea álkit beassat sáhkalaga eiseválddiiguin. Vuorkágovva: Nils Johan Vars

Áigot viidábut, vai šaddet gievrrat searvin

Sámi bivdo- ja meahcástansearvi lea dál čadnon Guovdageidnui ja háliida viiddidit doaimmaidis eará báikkiide ja vai sturošii ja buorebut olahit eiseválddiid.

18:34 Cuoŋománu 20. beaivi 2017
Ođastuvvon: 21.04.2017 - 09:14

Sámi bivdo- ja meahcástansearvvi jođiheaddji Johan Ingvald Hætta muitala sii leat ožžon jearaldagaid eará giliin, ahte livčče dáhttu ásahit sin guovlluide maid báikkálaš searvvi.

– Min meahcásteapmi lea hui mávssolaš midjiide, ja mii leat vuohttán ahte jus galgat olahit eiseválddiide, de fertešii mis leat eanet fápmu. Eará ládje organiseren ja stuorát searvi sáhttá leat okta vuohki buorebut beassat sáhkalaga nu movt FeFoin, Sámedikkiin ja eará eiseválddiiguin, lohká son.

 

Áitojuvvon

Sámi bivdo- ja meahcástansearvvis lea ballu ahte árbevirolaš sámi meahcásteapmi galgá jávkat, go leat nu unnán olbmot geat vižžet birgejumi meahcis.

– Sáhttá lohkat ahte dat lea áitojuvvon, ja danne fertet dahkat juoidá ovdal go nohká, ja mii šaddat dego bivdo- ja guolástansearvi mas lea dáža jurddašanmálle, lohká Hætta.

 

Sierra ealáhusfoanda

Hætta lohká sis lea ulbmil ahte okta oassi álbmogis galggašii sáhttit birget meahcástemiin, ja fertešii ásahuvvot ealáhusšiehtadus dasa maid eiseválddit hálddašit.

– Dainna boađášii meahcásteapmi oidnosii ja oaivvildan ahte jus máilmmis šaddá biebmoheahti, de leat goit mis dáppe Sámi mehciin guollejávrrit, muorjjit ja lottit, eat ge ábut manahit máhtu daid birra, lohká Hætta.

 

Áigot doarjut searvvi

Sámediggeráđđi leage čoahkkinastán Sámi bivdo- ja meahcástanservviin Guovdageainnus gaskavahku cuoŋománu 19. beaivvi, ja áigu doarjut searvvi.

– Searvi bargá dehálaš barggu ovddidit meahcásteami ja čalmmustahttit daid hástalusaid mat dál leat meahcásteamis, nu mat vuodjima ektui ja bivddu ja giđđaloddema ektui. Sámediggi oaidná dárbbu čohkket meahcásteddjiid iešguđetge báikkiin ovtta organisašuvdnii, nu ahte searvi šaddá nannoseabbon ja beaktileabbon, dadjá ráđđelahttu Eriksen.

 

Dehálaš oassi birgejumis

Sámediggi áigu dál nannet ovttasbarggu Sámi bivdo- ja meahcástanservviin ja veahkehit sin oažžut sadjái stuorát organisašuvnna.

– Sámediggi ii sáhte dohkkehit ahte báikeolbmot eai beasa dál ávkkástallat min luondduriggodagain nu go dolin. Meahcásteapmi lea dehálaš oassi min birgejumis, loahpaha sámediggeráđđi Inger Eline Eriksen.

MIELAS DOARJUT: Sámediggeráđi lahttu Inger Eline Eriksen. Govven: Åse Pulk, Sámediggi

Fáddásánit
Ođđasat

På forsiden nå