Vuorkágovva: Nils Johan Vars

Áigot gilvit ruvkeguovllu, ja turistaguovddáža álggahit

Ávjovári luonddugáhttenlihttu háliida Biedjovákki fas meahccin, dál go Guovdageainnu suohkanstivra lea mearridan guovllu fas LNFR-guovlun. Sii evttohit maid ráhkadit sierra turistaguovddáža, Biedjovákki ruvkedoaimma birra.

11:48 Cuoŋománu 12. beaivi 2017

Guovdageainnu suohkanstivra mearridii areálaplánas bidjat Biedjovákki fas LNFR-guovlun. Dat mearkkaša ahte guovlu galgá geavahuvvot eanandoallu, luonddu, olggostallán ja boazodoalloguovlun.

Ávjovári luonddugáhttenlihttu háliida guovllu fas meahccin, go lea mearriduvvon guvlui ii boađe šat ruvkedoaibma. Dan sii dieđihit preassadieđáhusas.

Sii evttohit guokte molssaeavttu mii sáhttá dahkkot guovlluin. Juogo ráhkadit turistabáikki gos čájehit ruvkebázahusaid, dahje buktit ruvkeguovllu ruovttoluotta meahccin nu ollu go vejolaš.

– Mii oaivvildit ahte berre árvvoštallat goappaš molssaeavttuid ja lea vejolašvuohta kombineret daid, lohká jođiheaddji Svein Lund preassadieđáhusas.

 

Ođđasit gilvit guovllu

Ávjovári luonddugáhttenlihttu háliida ahte guovlu galgá gilvojuvvot fas, ja leat guktii ovdal evttohan álggahit dan barggu.

– Miehtá Norgga leat boares veaikeruvkket gos leat álggahuvvon dákkár čorgendoaimmat. Mii berret oahppat dain. Dát doaimmat mákset dieđusge, muhto dan ovddasvástádus gullá stáhtii, mii lea addán lobi álggahit ruvkke.

Sii evttohit maid ahte guvlui álggahuvvo našunála ealáskahttin ja ođđasit vegeteren prošeakta

– Dalle sáhtášii geavahit guovllu nugo ovdal boazodollui, meahccásteapmái ja olggonastimii. Buvttášii bargosajiid Guovdageidnui, ja huksešii máhtu movt ođđasit vegetere árktalaš guovlluin.

 

Váldit vára ruvkehistorjjás

– Mii oaivvildit ahte berre váldit vára Biedjovákki ruvkehistorjjás, ja evttohit ráhkadit meahcceguovddáža gos lea čájáhus ruvkke huksema, doaimma ja heaittiheami birra.

Ávjovári luonddugáhttenlihttu jáhkká dat livčče báiki gosa turisttat vuolggášii.

–Ránes báktedieváin leat ollu miellagiddevaš minerálat, ja berre árvvoštallat movt daid sáhttá geavahit turismmas ja geassit gussiid geat beroštit geologiijas.

Fáddásánit
Ođđasat

På forsiden nå