Silje Karine Muotka lea nammaduvvon vuosttažin, ja nubbin ja goalmmádin leaba Nils Mikkelsen Utsi ja Gunn-Anita Jacobsen. Govven: NSR Preassagovva

NSR njunnošat Davve­guovllu válga­biires

Norgga Sámiid Riikasearvi (NSR) čađahan nammadeami Davveguovllu válgabiires, ja njunnošis lea Silje Karine Muotka.

16:08 Njukčamánu 21. beaivi 2017
Ođastuvvon: 13.06.2017 - 13:38

Ikte leat Norgga Sámiid Riikasearvi (NSR) čađahan nammadeami Davveguovllu válgabiires. Ledje Álttá sámiid searvi ja Návuona sámiid searvi geat mearridedje loahpalaš listu Davvi válgabiires, masa gullet Davvinjárga, Fálesnuorri, Hammerfeasta, Áltá, Ákŋoluokta, Láhppi, Návvuotna ja Ráisa.

 

Lea gearggus

Njunnošis lea Silje Karine Muotka, ja NSR váldoáššit šaddet sihkkarastet sámegielat mánáidgárdesajiid, gádjut Riehpovuona, bargat guolástanvuoigatvuođaid ja boazodoalu ovddas, ja nannet mearrasámi kultuvrra guovllus.

– Lean gearggus njealji ođđa jahkái Sámedikkis jus jienasteaddjit háliidit dan, lohká Muotka.

 

Advokáhtta nuppi sajis

Nuppi sadjái lea nammaduvvon Nils Mikkelsen Utsi.

– Lean ilus go leat ožžon fárrui advokáhta nuppi sadjái listus. Sus lea gelbbolašvuohta boazodoalus ja nana fágalaš duogáš mii lea máilmme dehálaš máŋgga sámepolitihkalaš áššiin ovddasguvlui, lohká Muotka.

 

– Ovddidan mearrasámi

Muotka lohká muđui listtus leat ollu buorit evttohasat.

– Návvuona sámiid searvvis lea mis goalmmát evttohas Gunn-Anita Jacobsen, gii ollu jagiid lea ovttas earáiguin bargan ovddidit mearrasámi kultuvrra Návvuonas, lohká son. Muotka maid geassá ovdán Inger Elin Utsi, gii lea maŋemus áigodagas leamaš fásta čoahkimastin áirras biire bealis.

– Ii leat nu dávjá olmmoš deaivá nu viššalis ja barggánis olbmo go Inger Elina. Sus leat ollu doaibmanávccat, ja lean rámis bargguin maid son lea čađahan dán rádjai, ja giitevaš go lea listus njealját sajis, lohká Muotka.

 

Viđat sajis listus lea easkaálgi ja politihkalaš taleanta Miriam Accouche.

– Son lea issoras čeahppi, lohká Muotka ja čujuha ahte Accouche lea čájehan jálluvuođa politihkalaš áššiin.

– Son duostá čuoččuhit maid oaivvilda, ja dárbbašuvvo maiddái sámi áššiin. Áiggun su ožžodit guovddaš rollaide nu movt ieš lea dáhtton, lohká Muotka gii illuda ovttasbargat Accouchiin.

 

Norgga Sámiid Riikasearvvi Davveguovllu válgabiire:

På forsiden nå